Nuut: Ena Murray Keur 15

Drie van Ena Murray se heel beste liefdesverhale word in Ena Murray Keur 15 saamgebind:

​Die pad terug huis toe​: ’n Grusame motorbotsing laat Karina Oosthuizen, gesogte en pragtige topmodel, blind en verlam agter, en skielik is sy weer totaal afhanklik van haar weduwee-moeder wat sy al byna afgesterf het. Sy, wat daarna gestrewe het om heel bo uit te kom, moet aanvaar dat sy net een heenkome het – die pad terug na die armsalige skakelhuisie waarop sy so neergesien het. Dan, onverwags, is daar iemand wat haar en haar moeder ’n toevlug bied na ’n pragtige wit huis by die see – perfek ingerig vir ’n persoon in ’n rolstoel. Maar sal Karina hierdie aanbod aanvaar as sy moet weet wie dié weldoener is?

​’n Vrou soos Salome​: Salome Truter, sanger van formaat, verleen glans aan elke geleentheid waar sy optree, hetsy op die verhoog of by ’n rykmansparty. Toe die joernalis Jaco Retief tydens so ’n partytjie verveeld tussen die kunstenaars en snobistiese ondersteuners van die kunste ronddwaal, sien hy haar eenkant sit. ’n Vreemde weerloosheid in haar andersins gesofistikeerde houding val hom op. Impulsief nooi hy haar vir ete, en dis teenoor hóm dat Salome vir die eerste keer openhartig oor haar persoonlike lewe praat, en laat blyk dat dit nie altyd so glansryk was nie. Hy besef sy eerste indruk was reg: onder die betowering van haar openbare beeld skuil daar oneindige
hartseer . . .

Die vrou in die spieël​​: Sy word wakker uit ’n oneindige diep slaap en voel totaal gedisoriënteer; herken nie eens die kamer waarin sy haar bevind nie. Niks, selfs nie die hande waarop sy afkyk, is háre nie, en  die vrou wat uit die spieël na haar terugkyk, is nie sy nie. Maar hoe sy behoort te lyk, kan sy ook nie sê nie, want skielik ontdek sy sy kan niks, absoluut niks onthou nie. En toe ’n lang, aantreklike man skielik die kamer binnestap, haar opraap en weer op die bed gaan neerlê met die streng vermaning dat sy moet rus, vou iets soos angs om haar toe, want hy noem haar Ansie, ’n naam wat sy in haar diepste wese wéét nie hare is nie . . .

Koop dit nou! MySubs Raru Loot Graffiti Amazon (Kindle)

Oor die skrywer:

Ena Murray is op die klein Karoodorpie Loxton gebore, die middelste van drie dogters. Haar pa was die plaaslike geneesheer, en dis hier waar haar groot belangstelling in die geneeskunde ontstaan het. Verskeie van haar verhale het dan ook ’n hospitaal as milieu. Sy het op Mosselbaai afgetree en is in Junie 2015 oorlede.

 

Nuut: Annelize Morgan Omnibus 8

Drie van Annelize Morgan se beste verhale word in Annelize Morgan Omnibus 8 versamel:

​Wit roos van geluk

Geluk kom partykeer langs vreemde weë. Toe Rosalie se moeder haar lank gelede op oom Markus se stoep kom neerlê het, was daar ’n kort briefie en ’n wit roos by die baba.

Dit was ’n wit roos van geluk en haar moeder, wat nie meer lank sou lewe nie, soos Rosalie later ontdek het, het haar baba op die drumpel van haar toekomsgeluk kom neerlê, maar dit het Rosalie eers jare later besef – toe iemand anders ’n bos spierwit rose vir haar gebring het . . .

Maar voordat dít gebeur het, het Rosalie deur diep water gegaan, want oom Markus se suster Hanna en tant Hanna se kinders wou haar nie op die plaas hê nie, en die man wat sy liefgekry het en wat háár ook liefgehad het, sou nie met haar kon trou nie – sy skatryk pa sou nie toelaat dat sy enigste seun met ’n aangenome kind trou nie . . .

​Huis sonder liefde

Toe Nora Fouché in Pretoria aankom om ’n rukkie by haar vriendin, Isolde Keppler, te gaan kuier, het sy gedink sy gaan ’n welverdiende ruskansie geniet. Die oomblik dat sy egter oor die drumpel van die Kepplers se luukse huis stap, besef sy daar is iets verkeerd. Iets verskriklik verkeerd. Alles, vanaf die skildery waaruit Isolde se oorlede stiefmoeder die hele huishouding met beskuldigende oë dophou, tot die afsydige tuinier, Anton Vermeulen, is in ’n wolk van geheimsinnigheid gehul. En wanneer Isolde dan nog, gedurende ’n wilde jaagtog ná ’n bakleiery met haar verloofde, Stephen Wright, van haar perd afval en verlam uit die ongeluk kom, verdiep die geheim van die Keppler-huishouding nog erger.

Die naam Paul van der Hoff duik soos klokslag in elke fluistergesprek op. Paul van der Hoff, die enigste seun van Clara Keppler uit haar vorige huwelik. Paul van der Hoff wat meer as ’n dekade gelede diep in Afrika verdwyn het en nou, na al die jare, op pad terug is om sy regmatige deel van dit wat hom toekom te kom eis. Watter onverklaarbare houvas het Van der Hoff op Hans Keppler, Isolde se pa, dat hy selfs bereid is om sy verlamde dogter op te offer nét om die gehiemsinnige man te vermy. En watter houvas het die oënskynlik dierbare dokter Jameson, wat Isolde behandel, en sy handlanger verpleegster, Agnes Bennet, op Hans Keppler dat hy soos klei in hulle hande is? En bo alles, watter verskriklike geheim lê opgesluit in die verlore dagboek van Clara Keppler, die dagboek waarna almal sónaarstiglik soek.

Silwer drome

Oswald van Noordwyk, die tiran van Overkruin-landgoed, sterf voodat hy vir Verona alles omtrent haar verlede vertel. Onopgeloste kwessies spook nou by Verona: Hoe is haar ouers dood? Is hulle grafte werklik iewers in die Amasone? Wat is die oorsprong en betekenis van die hangertjie wat haar ouers aan haar nagelaat het?

Oswald van Noordwyk laat aan Verona ’n opdrag na: Vind Konrad. Hy het jare gelede in die woude van die Amasone verdwyn, maar moet nou oor Overkruin kom heers.

Verona besluit om Amasone toe te gaan op ’n tweeledige ekspedisie: Sy wil haar ouers se grafte gaan soek én sy wil haar jeugliefde, Konrad, opspoor. Sal hy haar nog onthou? Sal hy antwoorde op haar vrae hê?
Maar belangriker: Lewe hy nog?

Die geheimsinnige Vasques verskyn uit die niet om talle kere Verona se lewe te red. Sal die spanning van ’n emosionele tweestryd en talle ontberings egter sy tol eis?

Koop dit nou! Loot | Raru | Takealot | MySubs | Van Schaik 

Oor die skrywer:

Annelize Morgan is ’n ou hand wat liefdesverhale betref. Sy het meer as 40 titels agter haar naam en is bekend vir haar verhale vol spanning en intrige, asook verhale wat in die woestyn afspeel. Sy en haar man woon op Ladismith.

Nuut: Ena Murray Keur 14

Drie van Ena Murray se heel beste liefdesverhale is in Ena Murray Keur 14 saamgebind: Weerklank van ons liefde’n Tyd om te ween en Die oujongnooi van Polkadraai.

Wanneer ’n wildvreemde meisie in Weerklank van ons liefde per ongeluk in dr. Rudolf van der Merwe se lewe – én sy woonstel, sy bed en sy slaapklere – beland, raak hy onherroeplik betrek by ’n tergende raaisel. Want dié naamlose meisie ly aan geheueverlies, en al leidraad is ’n koerantberig oor ’n onopgeloste moord waarvan die sleutelverdagte spoorloos verdwyn het . . .

Madie, noem Rudolf sy “nuwe vrou” (hy moet die skyn ter wille van sy reputasie bewaar) en hy weier om te glo sy kon haar stiefpa vermoor het. Maar waarom het sy gevlug? En vanwaar die duidelike tekens van aanranding aan haar liggaam? En die trouring aan haar vinger?

Net ’n groot skok sal haar verlede weer kan oopruk. En dis presies wat die verleidelike joernalis met die rooi kop, Catherine, besluit om te doen. Want sy wil Rudolf inpalm, al kos dit wat.

In ’n Tyd om te ween moet Paul Henning se hartaanval moet Rietspruit ‘n ander dokter kry. Maar Hybre, dokter Paul se dogter, vertrou nie die briljante dokter Ewald Waltmann nie. Wat kom soek so ‘n suksesvolle geneesheer op so ‘n klein plekkie? Die atmosfeer is van die begin af gelaai; reeds by hul eerste ontmoeting spat die vonke. En dit te midde van werklike hartseer en pyn in die dorp. ‘n Tyd om te ween is ‘n diep roerende verhaal waarin mense mekaar leer om te gee en waarin hulle besef: die lewe verloop selde soos ‘n mens dit beplan.

En in Die oujongnooi van Polkadraai gebruik Silpa haar besonderse grimeertalent om haarself ’n volle twintig jaar ouer te laat voorkom – sy beeld ’n middeljarige oujongnooi uit wat aansoek doen om die pos van huishoudster vir twee jong kinders. Maar sy het nie rekening gehou met die streng dog aantreklike pa van die kinders nie.

Oor die skrywer:

Ena Murray is op die klein Karoodorpie Loxton gebore, die middelste van drie dogters. Haar pa was die plaaslike geneesheer, en dis hier waar haar groot belangstelling in die geneeskunde ontstaan het. Verskeie van haar verhale het dan ook ’n hospitaal as milieu. Sy het op Mosselbaai afgetree en is in Junie 2015 oorlede.

Koop dit nou! MySubs CNA Raru Loot Graffiti Amazon (Kindle)

Nuut: Ettie Bierman Keur 12

Drie heerlike liefdesverhale deur die immergewilde Ettie Bierman verskyn hierdie maand in Ettie Bierman Keur 12:

In Vermoedelik verlief stort Mynie se wêreld in duie toe haar kêrel saam met ’n beeldskone meisie op die lughawe gesien is. Hoe meer Heinz verduidelik, hoe minder glo sy hom. Sy skryf aan Wewenaar, ’n prokureur wat in ’n hoekie vir eensames adverteer. Eindelik ontmoet sy hom, die skatryk en aantreklike Conrad Duvenhage.  Natuurlik het hy ’n prys – maar dít vermoed Mynie nie.

In Twee roepees vir ’n lewe is Arista paniekbevange toe dit lyk asof ’n motor haar op die sypaadjie gaan tref. Sy hardloop vorentoe om die bruggie te haal en die bestuurder besef te laat wat haar plan is. ’n Voet in ’n rooi sandaal tref die Citroën se windskerm en daar is die klank van skeurende metaal . . .

In ’n Rooikop en twee ridders kyk Addy die ou met die Blou Bul-T-hemp vlak toe hy vir haar ogies maak by die Paddanag wat sy vir Matotoland Ekotoerisme reël. Wat haar betref, het hy ’n toksakbrein. Haar soort man is eerder iemand soos doktor Marius Theron, vir wie sy so getrou bystaan sedert sy egskeiding.

Oor die skrywer:

Ettie Bierman is ’n gewilde skrywer van romantiese verhale. Sy woon sedert 2003 aan die suidkus van KwaZulu-Natal.

Koop dit nou! Takealot | Loot | Graffiti | Amazon Kindle

Lees ’n uittreksel uit Boeie van goud deur Ena Murray

Drie van Ena Murray se heel beste liefdesverhale verskyn vandeesmaand in een omnibus, Ena Murray Keur 12.

In Boeie van goud, een van die verhale, vra Charmain haar af: Hoekom het Quintus de la Harpe met haar getrou as hy haar nooit werklik sy vrou wou maak nie? Sy het hom lief, maar moet toekyk hoe sy skoonsuster en niggie wedywer om sy aandag. Wanneer Marius de la Harpe en Jacques Taute haar pad kruis, raak die situasie nog meer onverstaanbaar …

Lees ‘n uittreksel uit hierdie verhaal:


em-keur-12-cov

Charmain kyk verbaas op toe die eienares van die losieshuis haar kom roep vir ’n besoeker. Sy is nie gewoond daaraan dat sy besoek kry nie. Dan frons sy. Miskien is dit daardie lastige klerk wat sy in haar nuwe werk leer ken het. Eers wil sy die hospita vra om namens haar verskoning te maak. Dan stap sy maar tog voordeur toe.

Haar hart spring in haar keel toe sy die imponerende gestalte in die voorportaal sien staan en sy steek viervoet vas; dis hý wat nader stap.

“Ek is jammer ek kom sommer so sonder afspraak hier aan, maar ek is toevallig in die stad en het toe gedink om net te kom hoor hoe dit gaan,” sê hy nadat hulle gegroet het. “Hoe gaan dit?”

Sy kyk met blink oë na hom op. Dis die oë van ’n kind, vol onverbloemde, opregte vreugde. Charmain is nog te jonk en onervare om nou al die kuns aan te geleer het om nie haar hart so te ontbloot nie.

“Dit gaan goed, dankie, meneer De la Harpe. O, dis wonderlik om u weer te sien!”

Hy knik, sy oë ernstig, bestuderend. “Ek is bly om dit te hoor.” Hy kyk vlugtig om hom heen in die portaaltjie, wat duidelik verraai dat dit nie een van die beste losieshuise in die stad is nie. “Sal ons ’n entjie gaan ry?”

Weer blink en skitter die oë onbeskaamd, en hy hoef nie op ’n antwoord te wag nie. Vir die tweede keer in haar kort, saai lewetjie voel sy hoe sy in die luukse motor wat voor die deur staan, ingehelp word, en dit voel vir haar asof sy sweef. Hy het weer gekom! Hy het haar onthou! So dink sy deurentyd.

“Waar is jou kwaai vriendin?” vra hy glimlaggend toe hy langs haar inskuiwe en die masjien aanskakel.

Charmain lag. “Sy is weg op ’n toneeltoer. Sy is nie regtig so kwaai nie. Klara is ’n dierbare mens, en vir my soos ’n suster. Van die eerste oomblik af het sy my onder haar vlerk geneem en beskerm. Dit was maar deur haar dat ek die twee klein rolletjies gekry het. Ek is nie ’n goeie toneelspeelster nie,” erken sy met kinderlike eerlikheid, en die man glimlag weer.

“Vertel my meer van jouself. Jou vriendin het daardie aand, toe ek julle uitgeneem het vir ete, gesê jy is ’n weeskind. Is jy werklik heeltemal alleen op die aarde?”

“Ja. En as ek verlangse familie het, het hulle in elk geval jare gelede al van my vergeet.” Sy sê dit sonder enige verbittering en op ’n manier wat die gehardste hart sal aangryp, en die man frons diep. Hy bring die motor tot stilstand by een van die mooi uitkykpunte oor die stad en draai skuins na haar. Sy gesig is net ’n vae, donker vlek. Subtiel word haar powere lewensverhaaltjie uit haar getrek.

“Ek wil nog dankie sê vir die geld wat u vir my by Klara gelaat het. Ek het ’n briefie geskryf om dankie te sê . . .” sluit sy af.

“Ek het dit gekry, dankie.”

“Ek sal, sodra ek kan, dit aan u terugstuur. Ek het werk gekry in ’n boekwinkel.”

“Dit was ’n geskenk, nie bedoel om terugbetaal te word nie.” Hy kan haar ongemak aanvoel en vervolg: “Dis ’n groter kuns om te ontvang as om te gee, Charmain.” Sy is stil, en ’n rukkie lank is net hul asemhalings hoorbaar. Dan, skielik, lê sy vingers onder haar ken, word haar gesiggie na hom opgelig. “Jy is ’n pragtige ou meisietjie. Jy verdien . . .”

Hy bly skielik stil en sy kyk met groot oë na die gesig so naby hare. Toe sy lippe meteens saggies op hare druk, roer sy nie, sit net bewegingloos onder sy aanraking, en in die lig van ’n flou maan kan hy die wit boog van haar nek duidelik sien – sien hoe die kuiltjie in haar nek onreëlmatig klop . . . nes ’n wilde voëltjie wat hom skielik in ’n koutjie bevind . . .


Koop dit nou! Graffiti | Amazon Kindle | Loot

 

Nuut: Ena Murray Keur 12

Drie van Ena Murray se heel beste liefdesverhale verskyn vandeesmaand in een omnibus, Ena Murray Keur 12:

em-keur-12-covIn Diena van Die Eike bedryf Diena die losieshuis op Burgershoek – buite bereik van die skaduwee wat oor haar verlede hang. Tot die dag dat Melt Fouché op haar drumpel staan. Toe wéét sy: die verlede, in die persoon van dié briljante geneesheer, het haar ingehaal.

In Boeie van goud vra Charmain haar af: Hoekom het Quintus de la Harpe met haar getrou as hy haar nooit werklik sy vrou wou maak nie? Sy het hom lief, maar moet toekyk hoe sy skoonsuster en niggie wedywer om sy aandag. Wanneer Marius de la Harpe en Jacques Taute haar pad kruis, raak die situasie nog meer onverstaanbaar …

En in Kaalvoet Katryntjie dring Katryn Klem se hovaardige voog, Festus Dumas, daarop aan dat sy ná haar pa se dood by hom moet kom bly. Sommer vir die grap gee Katryn voor sy is ’n giggelende tiener, nie ’n verpleegster van twintig nie. Maar dié grap boemerang toe sy, met ’n hart wat pyn van haar onverklaarbare liefde, moet toekyk hoe die listige Shirley Rossouw haar voog probeer verlei …

Oor die skrywer:

Ena Murray is op die klein Karoodorpie Loxton gebore, die middelste van drie dogters. Haar pa was die plaaslike geneesheer, en dis hier waar haar groot belangstelling in die geneeskunde ontstaan het. Verskeie van haar verhale het dan ook ’n hospitaal as milieu. Sy het op Mosselbaai afgetree en is in Junie 2015 oorlede.

Koop dit nou! Graffiti | Amazon Kindle | Loot

Nuut: Ena Murray Keur 11

Drie gunstelingverhale deur Ena Murray verskyn hierdie maand in Ena Murray Keur 11 :

ena-murray-keur-11In Vreemdeling in Eden moet Karlien Steenkamp binne ’n week ’n man kry en trou as sy haar susterskind, klein Essie, wil behou nadat sy wees gelaat is. Julius Schreider, skatryk Seychellese sakeman, soek ook dringend ’n vrou – vir net ses maande. En Karlien gryp na hierdie strooihalm.

In Waar die wilde besembos bloei het Melinda se ma, Ursula, haar op agtjarige ouderdom verlaat om ’n glanslewe as rolprentster na te jaag. Dertien jaar later lê Melinda se pa op sterwe en sy gaan soek haar ma op die Kanariese Eilande. Ursula is verloof aan die Spaanse markies Lorenzo la Blanca en wil van Jim skei. Maar die markies weet watter vrou hy na Villa del Rosa wil neem …

In Altaarvure op Kandavu moet Marika Lubbe vir dr. De Wet Zandberg na die Fidji-eilande vergesel om sy dogtertjie te versorg. Daar kruis hul paaie met Irene, De Wet se vervreemde vrou, wat saam met dr. Graciël Engelhardt ’n hospitaal bestuur. Nie De Wet óf Graciël kan hul aangetrokkenheid tot Marika wegsteek nie …

Oor die skrywer:

Ena Murray is op die klein Karoodorpie Loxton gebore, die middelste van drie dogters. Haar pa was die plaaslike geneesheer, en dis hier waar haar groot belangstelling in die geneeskunde ontstaan het. Verskeie van haar verhale het dan ook ’n hospitaal as milieu. Sy het op Mosselbaai afgetree en is in Junie 2015 oorlede.

Koop dit nou! Graffiti | Raru | Amazon Kindle