Oktober boek van die maand: Liefde onbeperk deur Luné Olivier

Liefde onbeperk deur Luné Olivier is ons Oktober boek van die maand:

Lelanie Ferris wil nie ’n romanse aanknoop tydens haar vakansie in die Kaap nie. Maar Dian Bergh met sy groen oë en sterk gestalte toor behoorlik met haar sintuie. Nou worstel Lelanie voortdurend met die vraag: Hoe op dees aarde gaan hulle nét vriende wees wanneer hulle voortdurend moet keer om hul lippe en hande van mekaar af te hou?

Maar wie is die blondine wat om elke hoek en draai Dian se aandag probeer trek? En is Lelanie werklik reg om aan te beweeg ná die groot ontnugtering wat sy moes oorleef? Sy het boonop onlangs ’n groot verlies gely en sien werklik nie kans om nóg pyn te ervaar nie.

Dit blyk dalk nie eens nodig te wees om al hierdie vrae te beantwoord nie, want haar firma ondersoek ’n saak van korrupsie en sy ken een van die beskuldigdes. Wat is Dian se betrokkenheid en het hy haar net heeltyd om die bos gelei?

Koop dit nou! Takealot | Loot | Raru | Amazon (kindle)MySubs (digitaal)

Oor die skrywer:

Luné Olivier (skuilnaam) het op ’n vroeë ouderdom die droomwêreld van lees ontdek en was op skool en universiteit die redaktrise van hierdie instansies se koerante. Sy en haar gesin woon in Gauteng. Luné hou van kuns, en wanneer sy met vakansie gaan, is dit met ’n paar liefdesverhale heelbo in die tas gepak! Liefde onbeperk is haar eerste boek.

Nuut: Annelize Morgan Omnibus 8

Drie van Annelize Morgan se beste verhale word in Annelize Morgan Omnibus 8 versamel:

​Wit roos van geluk

Geluk kom partykeer langs vreemde weë. Toe Rosalie se moeder haar lank gelede op oom Markus se stoep kom neerlê het, was daar ’n kort briefie en ’n wit roos by die baba.

Dit was ’n wit roos van geluk en haar moeder, wat nie meer lank sou lewe nie, soos Rosalie later ontdek het, het haar baba op die drumpel van haar toekomsgeluk kom neerlê, maar dit het Rosalie eers jare later besef – toe iemand anders ’n bos spierwit rose vir haar gebring het . . .

Maar voordat dít gebeur het, het Rosalie deur diep water gegaan, want oom Markus se suster Hanna en tant Hanna se kinders wou haar nie op die plaas hê nie, en die man wat sy liefgekry het en wat háár ook liefgehad het, sou nie met haar kon trou nie – sy skatryk pa sou nie toelaat dat sy enigste seun met ’n aangenome kind trou nie . . .

​Huis sonder liefde

Toe Nora Fouché in Pretoria aankom om ’n rukkie by haar vriendin, Isolde Keppler, te gaan kuier, het sy gedink sy gaan ’n welverdiende ruskansie geniet. Die oomblik dat sy egter oor die drumpel van die Kepplers se luukse huis stap, besef sy daar is iets verkeerd. Iets verskriklik verkeerd. Alles, vanaf die skildery waaruit Isolde se oorlede stiefmoeder die hele huishouding met beskuldigende oë dophou, tot die afsydige tuinier, Anton Vermeulen, is in ’n wolk van geheimsinnigheid gehul. En wanneer Isolde dan nog, gedurende ’n wilde jaagtog ná ’n bakleiery met haar verloofde, Stephen Wright, van haar perd afval en verlam uit die ongeluk kom, verdiep die geheim van die Keppler-huishouding nog erger.

Die naam Paul van der Hoff duik soos klokslag in elke fluistergesprek op. Paul van der Hoff, die enigste seun van Clara Keppler uit haar vorige huwelik. Paul van der Hoff wat meer as ’n dekade gelede diep in Afrika verdwyn het en nou, na al die jare, op pad terug is om sy regmatige deel van dit wat hom toekom te kom eis. Watter onverklaarbare houvas het Van der Hoff op Hans Keppler, Isolde se pa, dat hy selfs bereid is om sy verlamde dogter op te offer nét om die gehiemsinnige man te vermy. En watter houvas het die oënskynlik dierbare dokter Jameson, wat Isolde behandel, en sy handlanger verpleegster, Agnes Bennet, op Hans Keppler dat hy soos klei in hulle hande is? En bo alles, watter verskriklike geheim lê opgesluit in die verlore dagboek van Clara Keppler, die dagboek waarna almal sónaarstiglik soek.

Silwer drome

Oswald van Noordwyk, die tiran van Overkruin-landgoed, sterf voodat hy vir Verona alles omtrent haar verlede vertel. Onopgeloste kwessies spook nou by Verona: Hoe is haar ouers dood? Is hulle grafte werklik iewers in die Amasone? Wat is die oorsprong en betekenis van die hangertjie wat haar ouers aan haar nagelaat het?

Oswald van Noordwyk laat aan Verona ’n opdrag na: Vind Konrad. Hy het jare gelede in die woude van die Amasone verdwyn, maar moet nou oor Overkruin kom heers.

Verona besluit om Amasone toe te gaan op ’n tweeledige ekspedisie: Sy wil haar ouers se grafte gaan soek én sy wil haar jeugliefde, Konrad, opspoor. Sal hy haar nog onthou? Sal hy antwoorde op haar vrae hê?
Maar belangriker: Lewe hy nog?

Die geheimsinnige Vasques verskyn uit die niet om talle kere Verona se lewe te red. Sal die spanning van ’n emosionele tweestryd en talle ontberings egter sy tol eis?

Koop dit nou! Loot | Raru | Takealot | MySubs | Van Schaik 

Oor die skrywer:

Annelize Morgan is ’n ou hand wat liefdesverhale betref. Sy het meer as 40 titels agter haar naam en is bekend vir haar verhale vol spanning en intrige, asook verhale wat in die woestyn afspeel. Sy en haar man woon op Ladismith.

Lees ’n uittreksel uit Omdat jy jy is deur Elsa Winckler

Omdat jy jy is deur Elsa Winckler is ons September boek van die maand:

Kathleen en haar susters erf elk vyf miljoen rand van hul tante Peet, mits hulle elkeen ’n maand in haar huis op Greyton bly. Kathleen is eerste aan die beurt, maar sy het nie kon raai dat ’n mooi man met viooltjieblou oë die kothuis agter die huis sou huur nie. Gou broei meer as goeie buurmanskap tussen haar en Steyn Erasmus . . .

Lees ‘n uittreksel:


Sy doen haar bes om nie na sy bykans ontblote bolyf te kyk nie, maar die prentjie van ’n baie sexy six-pack gaan sy nog lank onthou.

“Steyn?” vra sy en raak versigtig aan sy arm. Hy voel warm. “Steyn!” roep sy en dié keer skud sy sy arm.

“Wat de hel?” kreun hy en laat sak sy arm. Sy oë is bloedbelope en die donker kringe onder sy oë meer prominent as gisteraand.

Sy druk ’n hand teen sy voorkop. Hy is vuurwarm. Leen is nie ’n dokter nie, maar sy het nie ’n mediese graad nodig om te weet die man het koors nie.

“Het jy pyn?” vra sy. “Het jy iets in jou sak wat jy kan drink?”

Hy staar verdwaas na haar.

“Ek is Kathleen. Jy is in die kothuis van my . . . agter die huis waar ek bly. Op Greyton?”

“Die mooi girl,” prewel hy, steek sy hand uit en vat aan haar poniestert wat oor haar skouer hang. Hy glimlag skeef. “Gedink dis sag.” Sy hand val terug en sy oë gaan weer toe.

Sy trek haar asem vinnig in en staan regop. Lawwe skoenlappers fladder op haar maag. Die man yl, hy dink seker sy is iemand anders. Die mooi girl? Sy is nie onaardig nie, maar beslis nie die tipe oor wie digters odes sal skryf nie. Ja-nee, hy verwar haar beslis met iemand anders.

“Steyn, het jy pille in jou sak?” vra sy weer, maar sy arm het weer oor sy oë geval.

Sy draai weg en gaan haal die sak op die stoep. Terug langs hom, rits sy die sak oop.

“Steyn, ek gaan in jou sak krap, oukei?” gesels sy terwyl sy soek na pille of iets wat soos medikasie lyk.

’n Selfoon lui. Dis nie hare nie. Kathleen staak haar soekery na die pille en kyk rond waar die foon is wat lui. Onder die bank waarop Steyn lê, kry sy die selfoon. Dit moes uit sy sak geval het toe hy op die bank gaan lê het.

Dis “Ma” wat bel. Sy huiwer net ’n oomblik voordat sy antwoord. Sy ma sal hopelik weet of hy pille het wat hy kan drink.

“Hallo,” groet sy.

Dis stil aan die ander kant van die foon.

“My naam is Kathleen Mulder. Is u mevrou Erasmus?”

“Ja,” sê ’n vrouestem onseker. “Ek het my seun probeer bel? Is hy oukei? Het iets met hom gebeur? Waar is hy?” Die stem klink al meer bekommerd met elke vraag.

“Hy huur die kothuis agter my tante . . . agter die huis waarin ek bly. Op Greyton?”

“Greyton? Hoekom sou hy soontoe gaan? Waar lê Greyton nou weer? Is hy oukei?”

Kathleen kyk af na waar Steyn nog doodstil lê.

“Greyton is in die Overberg, so ’n uur of wat uit Kaapstad. Ek . . . dink u seun is oukei, maar hy het dalk koors . . .”

“As ek my sonde nie ontsien nie!” roep die vrouestem aan die ander kant gefrustreer uit. “Tipies! Hy is deur twee operasies. Daai ellendige fiets van hom! Ek het voorgestel hy kom bly by my totdat hy weer op die been is, maar nee. Hy is so hardekwas. Gerard, sy goeie vriend en huisdokter, het gesê hy is ook heeltemal oorwerk en moet homself ’n maand kans gee om heeltemal te herstel. Maar wat doen hy? Klim met sy seer arm in ’n motor en ry na Timboektoe. Hy het nou wel ’n outomatiese motor, maar hoe stom-onnoselik kan ’n mens wees? Oe, mansmense maak my so kwaad, hulle . . .”

En die stem klim weer ’n paar oktawe terwyl sy mans se baie tekortkominge lys. Kathleen is nie heeltemal seker hoe om die situasie te hanteer nie. Wat sy wel weet, is dat die man voor haar so gou moontlik iets moet inkry vir sy koors.

“Mevrou Erasmus,” onderbreek sy die tirade. “Uhm, dis Greyton, nie Timboektoe nie. Ek wil in sy sak kyk of hy iets het vir koors. Ek . . . ek sal hom sê u het gebel.”

“Jy kan ook vir hom sê ek en die meisiekinders kom so gou moontlik. Ons ry van die Kaap af en ek is nie presies seker hoe lank dit gaan neem nie. Sal jy asseblief intussen kan kyk dat hy vloeistof inkry? Hy het so ’n stokou blou badkamersak van sy pa waaraan hy steeds vasklou, kyk of jy dit kry. Hy het baie swaar gekry ná my man se dood en . . . Ek dwaal al weer af. As hy enige medikasie by hom het, behoort dit daarin te wees. Ek sal in elk geval weer ’n voorskrif by die dokter kry. Ek moes geweet het daar is moeilikheid toe hy nie gister my oproep beantwoord nie. Hy stuur toe net ’n boodskap vir sy ma, bid jou aan.”

Kathleen kan nie help om te glimlag vir die vrou nie. Sy is baie verontwaardig en dis duidelik sy is baie betrokke by haar seun. Wie die “meisiekinders” is wat gaan saamkom, sal sy moet wag om te sien.


Omdat jy jy is deur Elsa Winckler is ons September boek van die maand.

Koop dit nou! MySubs | Takealot | Loot | Raru | Amazon (Kindle)

September boek van die maand: Omdat jy jy is deur Elsa Winckler

Omdat jy jy is deur Elsa Winckler is ons September boek van die maand:

Kathleen en haar twee susters erf elkeen vyfmiljoen rand na hul geliefde tante Peet se afsterwe, mits hulle ’n vreemde bepaling nakom: Hulle moet elkeen eers ’n maand lank in ta’ Peet se huis op Greyton gaan bly.
In hul gejaagde lewens het nie een van die drie werklik hiervoor tyd nie, maar Kathleen stem in om eerste te gaan, want sy moet in elk geval aan ’n sakeplan vir haar aanlyn-onderneming werk.

Sy het egter nie daarmee rekening gehou dat iemand die kothuis agter ta’ Peet se huis sou huur nie. Beslis nie ’n aantreklike man met viooltjieblou oë nie. Sake-konsultant Steyn Erasmus se arm is in ’n hangverband en Kathleen ontferm haar oor hom. Maar wat tussen hulle broei, is veel meer as net goeie buurmanskap . . .

Koop dit nou! MySubs | Takealot | Loot | Raru | Amazon (Kindle)

Oor die skrywer:

Elsa Winckler is ’n gewilde skrywer van liefdesverhale. Sy het al die gesogte ATKV-Woordveertjie vir romanses gewen vir Tussen jazz en rock (LAPA) in 2010, Te eenders, te anders(Satyn) in 2014, en Liefde in laslap (Satyn) in 2016. Sy woon op Bettysbaai.

 

Lees ’n uittreksel uit Pad na Geluk deur Moryn Hanzen

Nina, ‘n stadsmeisie in murg en been, sou nooit kon raai dat die pad na die plaas Geluk haar ook na oom Chris se kleinseun, Ian, sou neem nie – die aantreklikste man wat sy nog ooit gesien het. Vir die eerste keer in haar lewe kry ’n man dit reg om haar voete onder haar uit te slaan. Maar ’n verhouding tussen hulle sal tog nooit werk nie . . . of hoe?

Vir ‘n voorsmakie van Moryn Hanzen se heerlike plaasromanse, lees ‘n uittreksel uit Pad na Geluk:


“Hoe het jy geweet ek is hier?” vra sy tussen stywe lippe deur. Die koel water voel skielik yskoud teen haar grotendeels ontblote liggaam.

“In die eerste plek het ek jou klere al van ver af oor die windpomp sien hang. Jy weet, as ’n mens die veld en jou omgewing goed ken, trek iets wat nie daar hoort nie, soos daardie wit klere byvoorbeeld, onmiddellik die aandag. En selfs al het jy jou klere beter weggesteek, is ek bevrees Tjoppie sou steeds jou teenwoordigheid verraai het.”

Nina kyk vraend na Ian.

“Sy kom nooit alleen hiernatoe nie en meestal ook net saam met iemand waarvan sy besonder baie hou, so jy kan nogal regtig geëerd voel dat ons troetelvark jou vergesel het.”

Nina beweeg so ongemerk moontlik al verder van Ian af weg terwyl sy wonder hoe lank sy nog sal moet watertrap. Vervlaks, haar hart kan gerus bedaar.

Ian bly staan aan die vlakker kant, die water tot net bokant sy middellyf. Die son blink op sy nat, bruingebrande bolyf. Sy weet nie wat hy alles uitgetrek het terwyl haar rug gedraai was nie. Vir al wat sy weet, is hy ook net in sy onderklere. Sy hoop in elk geval dat hy minstens dít aanhet.

Nina het ’n stryd om haar oë van Ian af te hou. Sy bevind haar nou aan die diep kant waar die water ver oor haar kop sal wees. Sy bly egter dapper watertrap terwyl hy haar met ’n onpeilbare uitdrukking in die oog hou.

“As ek geweet het jy wil kom swem, het ek vroeër huis toe gekom om by jou aan te sluit,” terg hy haar. “Jy moet my laat weet wanneer jy weer sulke planne het. Die dam daar naby die huis is eintlik baie groter en skoner as hierdie een.”

Die volgende oomblik kramp Nina se kuit met mening sodat sy met ’n uitroep onder die water verdwyn. Sy kan hoor hoe Ian met sterk hale nader swem. Nina se asem raak gevaarlik min. Hoekom help hy haar nie? Haar skamele onderklere is op hierdie oomblik ’n bysaak.

Ian kry haar aan die arm beet en trek haar geleidelik saam met hom na die oppervlak. Die volgende oomblik vat hy haar met mening vas en druk Nina se lyf teen hom vas.

Die sensasie wat sy harde liggaam so skielik teen haar eie veroorsaak, laat haar ophou spartel. Nina is maar net te bewus van Ian se gespierde bene rakelings teen hare.

Uiteindelik is hulle koppe bo die water en swem hy met haar na die vlak kant terwyl sy na haar asem hyg.

“My kuit . . . kramp.” Sy klou om lewe en dood aan hom vas toe hulle eindelik styf teen mekaar aan die vlak kant staan.

“Ontspan, meisie, ontspan. Alles is oukei.” Met sy een arm nog om haar lyf, vat hy haar been met sy ander hand vas en trek dit langs sy lyf op sodat hy haar kuit kan bykom om dit te masseer. “Dié een?”

Sy byt op haar tande en knik net woordeloos.

Na ’n rukkie voel Nina hoe die ergste spanning en skok begin skietgee. Ian se warm hand het die kramp uitgevryf. Die hitte van sy liggaam so intiem teen hare dring gloeiend tot haar deur.

“Dankie, dis . . . dit is nie meer seer nie,” kry sy uit, en hy laat haar been stadig terugsak.

Ondanks haar netelige situasie, stu ’n gevoel van algehele veiligheid deur Nina waar sy in Ian se stewig omhelsing staan. Haar knieë is erg bewerig. As hy van haar af moet wegstaan, sal hy haar in haar nat onderklere sien en sal sy sowaar sterf!

Haar vingers klou nog stywer om sy rug vas.

“Nina?” kom dit sag bokant haar kop.

“Ja?” antwoord sy onseker terwyl sy na sy ritmiese hartklop onder haar oor luister.

“Waarom was jy vanoggend ontsteld? Jou ouma het vertel van die pofadder wat julle in die veld gekry het. Was dit die skok?”

“Ek . . . Seker, ja,” antwoord sy, skielik self nie meer seker hoekom alles haar so oorweldig het nie. Sy voel hoe sy arms nog ’n aks stywer om haar span. So salig moet dit wees om iemand te hê wat jou vreugde en jou kommer met jou deel.

Onverwags laat Ian vir Nina gaan en keer hy sy rug op haar. Met ’n sagte, skor stem beveel hy haar om uit te klim en aan te trek.

Nina laat nie op haar wag nie. Bewerig, maar so gou as moontlik kry sy die rand van die dam beet en klouter daaroor.

“Gebruik my hemp om jou mee af te droog,” kom dit sag vanuit die dam.

Sy sluip om na waar hy sy hemp uitgetrek het en klem dit soos ’n kleinood teen haar bors vas terwyl sy Ian se nou reeds bekende skoon, manlike reuk inasem. Vinnig droog sy die ergste nattigheid daarmee af terwyl sy wonder waarom hy so stil geraak het.

Sy trek blitsig aan en loer oor die rand. Haar oë speel ’n paar sekondes oor die man wat nou rustig met geslote oë op sy rug dryf. Hoe dankbaar is sy dat hy nie ’n paar minute vroeër opgedaag het terwyl sy dieselfde gedoen het nie. Sy kan nie anders as om sy perfekte liggaam te bewonder nie. Hy het darem sy kortbroek aangehou, sien sy. Maar dit is steeds genoeg om haar pols gevaarlik te laat versnel. Wat doen hierdie man aan haar?

Natuurlik is dit niks anders as fisieke aantrekkingskrag nie.

Sy skud Ian se hemp ’n paar keer uit om van die ergste water ontslae te raak en hang dit oor die dam se rand.

Op die ingewing van die oomblik spat sy speels ’n paar druppels na sy ontspanne gesig, met die lippe effens oop. Is dit hoe hy lyk wanneer hy slaap?

Hy skrik en lag toe hy in haar gesig bokant die rand van die dam vaskyk.

Vir ’n oomblik het sy mond so weerloos gelyk.


Pad na Geluk  deur Moryn Hanzen is NB-Uitgewers se Augustus boek van die maand.

Koop dit nou! Takealot | Loot | Leserskring | Graffiti | MySubs (digitaal) | Raru | Amazon Kindle 

Augustus boek van die maand: Pad na Geluk  deur Moryn Hanzen

Pad na Geluk  deur Moryn Hanzen is NB-Uitgewers se Augustus boek van die maand:

Nina neem ’n blaaskansie van haar besig lewe as haarkapper en -stilis in Pretoria om haar ouma Anita Kalahari toe te neem waar sy by haar jarelange vriend, oom Chris, wil gaan kuier. Maar Nina sou nooit kon raai dat die pad na die plaas Geluk haar ook na oom Chris se kleinseun, Ian, sou neem nie – die aantreklikste man wat sy nog ooit gesien het.

Vir die eerste keer in haar lewe kry ’n man dit reg om haar voete onder haar uit te slaan. Maar ’n verhouding tussen hulle sal tog nooit werk nie. Nina is ’n stadsmeisie en Ian is ’n boer in murg en been. Sy sal nooit op ’n plaas in die halfwoestyn aard nie.

Nina moet maar liewer teruggaan na die standvastige Carl wat haar gesoen het voor sy uit Pretoria weg is – al is hy so koel en korrek. Buitendien blyk dit dat Ian steeds vir sy vriendin Zanelle gevoelens het . . . Watter ander rede kan daar tog wees dat Zanelle se verloofde agterdogtig is oor hom?

Oor die skrywer:

Moryn Hanzen woon buite Upington. Sy het al tydskrifartikels, kortverhale en kinderstories geskryf. Pad na Geluk is die eerste liefdesverhaal uit haar pen. Jeugevangelisasie lê haar na aan die hart, en sy put groot vreugde uit haar gesin, boeke, musiek, vriende en diere.

Koop dit nou! Takealot | Loot | Leserskring | Graffiti | MySubs (digitaal) | Raru | Amazon Kindle 

Nuut: Hartklop Omnibus 3

Drie romantiese liefdesverhale wat teen ’n mediese agtergrond afspeel verskyn in Hartklop Omnibus 3. 

Heler van skade​ deur Malene Breytenbach: Lucinda O’Neill word ’n pos as pediater by die Wynland-kliniek vir Aansteeklike Siektes aangebied en dit bring ’n algehele ommekeer in haar lewe mee – en nie slegs op professionele gebied nie. Want hier ontmoet sy vir Werner Huber, ’n siviele ingenieur, wie se seun tydens ’n werkskontrak in Afrika ’n tropiese siekte opgedoen het. Wanneer hy die seuntjie na die kliniek bring, maak dit ’n groter impak op Lucinda se lewe as wat sy ooit kon voorsien het. En intussen maak die resiesjaer Edwin van Reenen, wat haar ken sedert hulle kinderdae in die weeshuis, aanspraak op haar vriendskap en liefde. Lucinda het haar nog altyd van liefdesverbintenisse weerhou; haar werk was haar erns. Maar in die Wynland-kliniek word sy verplig om keuses te maak – en meteens lyk haar pad vorentoe baie gekompliseerd.

Die dokter se geheime passie​ deur Rykie Roux: Janli Filmalter, ’n toegewyde mediese student in haar vyfde jaar, en dokter Christiaan Lombard ken mekaar al vandat sy ses en hy nege jaar oud was. Hulle ken ook mekaar se families goed – dalk té goed. Waarom haat Christiaan haar skatryk pa so? Sal hy Gé, haar losbol-broer, kan vergewe vir wat hy aan sy onskuldige kleinsus gedoen het? Maar die belangrikste: probeer Christiaan op die Filmaters wraak neem deur Janli te verlei?

Ontmoet my in Patong​ deur Madeleine Malherbe: Laura Els is glad nie baie gelukkig in die hospitaal waar sy verpleeg nie. Miskien is dit omdat haar kêrel, Braam, weg is Engeland toe. Of dalk is dit nog die nadraai van die tsoenami- gebeure. Wat ook al, Laura besluit om Engeland toe te gaan, na Braam toe. Maar voor dit wil sy eers terug Thailand toe vir ’n kort vakansie om deur die herinneringe van die tsoenami en haar tyd daar te werk. In Thailand ontmoet sy toevallig weer die Engelse sakeman, Francis, wie se lewe sy destyds gered het. Die aantrekkingskrag tussen hulle skryf Laura toe aan die feit dat sy hom destyds gered het. Natuurlik sal so iets mens nader aan mekaar bring! En sy is immers nog verlief op Braam. In Patong het die lewe egter sy eie loop . . .

Koop dit nou! CNA | Loot | Van Schaik |  Graffiti | Amazon (Kindle) | MySubs