Nuut: Ena Murray Keur 15

Drie van Ena Murray se heel beste liefdesverhale word in Ena Murray Keur 15 saamgebind:

​Die pad terug huis toe​: ’n Grusame motorbotsing laat Karina Oosthuizen, gesogte en pragtige topmodel, blind en verlam agter, en skielik is sy weer totaal afhanklik van haar weduwee-moeder wat sy al byna afgesterf het. Sy, wat daarna gestrewe het om heel bo uit te kom, moet aanvaar dat sy net een heenkome het – die pad terug na die armsalige skakelhuisie waarop sy so neergesien het. Dan, onverwags, is daar iemand wat haar en haar moeder ’n toevlug bied na ’n pragtige wit huis by die see – perfek ingerig vir ’n persoon in ’n rolstoel. Maar sal Karina hierdie aanbod aanvaar as sy moet weet wie dié weldoener is?

​’n Vrou soos Salome​: Salome Truter, sanger van formaat, verleen glans aan elke geleentheid waar sy optree, hetsy op die verhoog of by ’n rykmansparty. Toe die joernalis Jaco Retief tydens so ’n partytjie verveeld tussen die kunstenaars en snobistiese ondersteuners van die kunste ronddwaal, sien hy haar eenkant sit. ’n Vreemde weerloosheid in haar andersins gesofistikeerde houding val hom op. Impulsief nooi hy haar vir ete, en dis teenoor hóm dat Salome vir die eerste keer openhartig oor haar persoonlike lewe praat, en laat blyk dat dit nie altyd so glansryk was nie. Hy besef sy eerste indruk was reg: onder die betowering van haar openbare beeld skuil daar oneindige
hartseer . . .

Die vrou in die spieël​​: Sy word wakker uit ’n oneindige diep slaap en voel totaal gedisoriënteer; herken nie eens die kamer waarin sy haar bevind nie. Niks, selfs nie die hande waarop sy afkyk, is háre nie, en  die vrou wat uit die spieël na haar terugkyk, is nie sy nie. Maar hoe sy behoort te lyk, kan sy ook nie sê nie, want skielik ontdek sy sy kan niks, absoluut niks onthou nie. En toe ’n lang, aantreklike man skielik die kamer binnestap, haar opraap en weer op die bed gaan neerlê met die streng vermaning dat sy moet rus, vou iets soos angs om haar toe, want hy noem haar Ansie, ’n naam wat sy in haar diepste wese wéét nie hare is nie . . .

Koop dit nou! MySubs Raru Loot Graffiti Amazon (Kindle)

Oor die skrywer:

Ena Murray is op die klein Karoodorpie Loxton gebore, die middelste van drie dogters. Haar pa was die plaaslike geneesheer, en dis hier waar haar groot belangstelling in die geneeskunde ontstaan het. Verskeie van haar verhale het dan ook ’n hospitaal as milieu. Sy het op Mosselbaai afgetree en is in Junie 2015 oorlede.

 

Nuut: Hartklop Omnibus 3

Drie romantiese liefdesverhale wat teen ’n mediese agtergrond afspeel verskyn in Hartklop Omnibus 3. 

Heler van skade​ deur Malene Breytenbach: Lucinda O’Neill word ’n pos as pediater by die Wynland-kliniek vir Aansteeklike Siektes aangebied en dit bring ’n algehele ommekeer in haar lewe mee – en nie slegs op professionele gebied nie. Want hier ontmoet sy vir Werner Huber, ’n siviele ingenieur, wie se seun tydens ’n werkskontrak in Afrika ’n tropiese siekte opgedoen het. Wanneer hy die seuntjie na die kliniek bring, maak dit ’n groter impak op Lucinda se lewe as wat sy ooit kon voorsien het. En intussen maak die resiesjaer Edwin van Reenen, wat haar ken sedert hulle kinderdae in die weeshuis, aanspraak op haar vriendskap en liefde. Lucinda het haar nog altyd van liefdesverbintenisse weerhou; haar werk was haar erns. Maar in die Wynland-kliniek word sy verplig om keuses te maak – en meteens lyk haar pad vorentoe baie gekompliseerd.

Die dokter se geheime passie​ deur Rykie Roux: Janli Filmalter, ’n toegewyde mediese student in haar vyfde jaar, en dokter Christiaan Lombard ken mekaar al vandat sy ses en hy nege jaar oud was. Hulle ken ook mekaar se families goed – dalk té goed. Waarom haat Christiaan haar skatryk pa so? Sal hy Gé, haar losbol-broer, kan vergewe vir wat hy aan sy onskuldige kleinsus gedoen het? Maar die belangrikste: probeer Christiaan op die Filmaters wraak neem deur Janli te verlei?

Ontmoet my in Patong​ deur Madeleine Malherbe: Laura Els is glad nie baie gelukkig in die hospitaal waar sy verpleeg nie. Miskien is dit omdat haar kêrel, Braam, weg is Engeland toe. Of dalk is dit nog die nadraai van die tsoenami- gebeure. Wat ook al, Laura besluit om Engeland toe te gaan, na Braam toe. Maar voor dit wil sy eers terug Thailand toe vir ’n kort vakansie om deur die herinneringe van die tsoenami en haar tyd daar te werk. In Thailand ontmoet sy toevallig weer die Engelse sakeman, Francis, wie se lewe sy destyds gered het. Die aantrekkingskrag tussen hulle skryf Laura toe aan die feit dat sy hom destyds gered het. Natuurlik sal so iets mens nader aan mekaar bring! En sy is immers nog verlief op Braam. In Patong het die lewe egter sy eie loop . . .

Koop dit nou! CNA | Loot | Van Schaik |  Graffiti | Amazon (Kindle) | MySubs

Julie boek van die maand: Marlene en die macho man deur Anita du Preez

Marlene en die macho man deur Anita du Preez is NB-Uitgewers se Julie boek van die maand:

Van hul skooldae af het almal gedink dat Marlene Burger en Tom Lourens vir mekaar bestem is. Maar Marlene, met haar voorliefde vir avontuur en adrenalien, wou haar nie vroeg reeds aan ’n rustige huislike bestaan bind nie. Nee, sy het luitenant-kolonel Marlene Burger van die SAPD geword, haar plek in ’n manswêreld oopbaklei en kriminele laat les opsê.

Maar nou is daar ’n kans vir Marlene en Tom om weer te probeer om ’n verhouding te hê – ná hulle elk ’n mislukte huwelik agter die rug het.

Gaan dit dié keer werk? Want vlootoffisier Lourens blyk onnodig versigtig te wees wanneer dit by hul verhouding kom; sý weer oorhaastig.

Die geheimsinnige Ziegfried van Leeuwen, wat dalk die ontwykende straatkunstenaar De Leeuw kan wees, verskyn boonop op die toneel en is met luitenant-kolonel Burger gefassineer. En skielik moet Marlene besluit wat sy werklik wil hê . . .

Oor die skrywer:

Anita is gebore in Port Elizabeth. Sy het in die visuele kunste studeer en aan UNISA haar BA-honneurs en Magistergraad verwerf, albei cum laude. Sy is ’n ma van drie, woon in Kaapstad en is ’n beeldhouer en lektrise in die visuele kunste (CTI, Durbanville- en Claremont-kampusse).

Koop dit nou!  MySubs | Raru Loot Graffiti Amazon (Kindle) 

Nuut: Susanna M Lingua Gunstelinge 6

Drie gunsteling-liefdesverhale deur Susanna M Lingua – Waar die frangipani bloei, Lied van die Isar en Jy is my droommeisie – verskyn hierdie maand in ‘n nuwe omnibus, Susanna M Lingua Gunstelinge 6:

In Waar die frangipani bloei is die streng, tradisievaste Portugese Edelman die Duque Diago de Velira Cervantes in beheer op die rustige dorpie Braco aan die kus van Afrika.  Niemand op die dorpie sal ooit droom om teen die wense en begeertes of instruksies van dié adellike hertog te handel nie. Tot die beeldskone, moderne Ronelle Dekker haar vader op Braco besoek. Heel gou kom Ronelle tot die ontdekking dat haar moderne lewensuitkyk en haar moderne kleredrag reëlreg indruis teen die streng, ongenaakbare Duque se tradisies en beginsels. Met haar vurige, selfstandige geaardheid en haar drang na avontuur, kom Ronelle uit die staanspoor in botsing met die wense van die ewe vurige, aantreklike Portugese hertog en dis nie lank voordat die vonke op Braco spat nie . . .

In Lied van die Isar gaan kuier Tillie Joubert vir twee maande by haar familie in Duitsland nadat sy haar onderwysstudies voltooi het. Daar ontmoet sy die aantreklike baron Ludwig Krafft. Hy raak dadelik halsoorkop verlief op die meisie uit Suid-Afrika, en teenstrydig met die tradisies van die Kraffts, vra hy haar om met hom te trou, al is sy nie uit die Duitse adelstand nie. Nadat haar ouers aanvanklik teësinnig was oor die vinnige romanse, gee hulle uiteindelik toe en Tillie trou met haar baron. Daar is egter een vlieg in die salf in die vorm van Heidi, Loui se weduweesuster wat by hulle op Burkenhof kom woon. Sy is baie jaloers op Tillie en doen haar bes om die jong vrou by haar man in onguns te bring. Toe Tillie ontdek dat sy ’n baba verwag, slaag Heidi byna daarin om die jong huwelik én vir Tillie te vernietig. Tillie verloor in elk geval die baba. Op Loui se aandrang gaan kuier Tillie vir haar ouers in Suid-Afrika, en aanvaar dat sy Loui se liefde verloor het.

En in Jy is my droommeisie voel Liza Steenberg dat die lewe haar verbygaan op die klein plattelandse dorpie Denneheuwel. Johannesburg met sy polsende stadslewe wink vir haar, en kort voor lank bekom sy ’n betrekking by ’n vooruitstrewende sakeonderneming. Rademeyer-beleggings se direkteur, Thys Rademeyer, is lank, blond en onweerstaanbaar aantreklik. Hy soek lankal na sy droommeisie, sy feeprinsessie, maar hoe moet hy kies tussen die mooie Liza en sy bekwame, beeldskone sekretaresse wat haar vangnet al jare lank fyn span?

Oor die skrywer:

Susanna M Lingua het reeds op sestienjarige ouderdom begin skryf, maar haar werklike skrywersloopbaan het in 1952 begin toe haar eerste manuskrip deur ‘n uitgewer vir publikasie aanvaar is. Sy is in 1997 oorlede, met 58 gepubliseerde boeke agter haar naam.


 Koop dit nou!  MySubs | Raru | Loot | Graffiti | Amazon (Kindle)

Luister na Malene Breytenbach se onderhoud op RSG Skrywers en Boeke

Malene Breytenbach is een van Afrikaans se mees bedrewe skrywers met meer as 30 liefdesverhale en 6 romans op haar kerfstok. Sy het onlangs op RSG se Skrywers en Boeke-program met Suzette Kotzé-Myburgh gesels oor haar skryfwerk.

Sy beantwoord onder meer die volgende vrae:

  • Wat is die verskil tussen ’n romanse en ’n roman?
  • Waar kom haar skryflus vandaan?
  • Hoe lyk haar skryf-werkswyse?
  • Waar kom haar storietemas vandaan?
  • Hoe vind haar studies neeslag in haar werk?
  • Wat is die moeilikste van skryf?
  • Hoe doen sy haar navorsing?

Die onderhoud begin by 5:40. Luister na die potgooi:

 

(Of luister op RSG )


Van sorg na liefde deur Malene Breytenbach was NB-Liefdesverhale se Mei boek van die maand. 

Koop dit nou!  Raru | Graffiti Takealot (eboek) | Amazon (eboek) |

 

 

Nuut: Helene de Kock Keur 1

Helene de Kock Keur 1 bevat vier verruklike liefdesverhale met drama, intrige en ontstuimige onderstrome.

Die soete dwaling: Dr. Daïrus Deetlefs se ma probeer om sy lewe te regeer en om ʼn troue tussen hom en Martine te reël. Daïrus vlug na Londen en ontmoet daar iemand uit sy verlede, die misterieuse Sylvia Saunders.

Seisoen van die skimmelson: Madel studeer sang in Beiere en moet haar jeugliefde agterlaat. Net tydelik, so glo sy. Sy besef egter mettertyd dat sommige keuses moeiliker is as ander.

Anderkant die vloedwaters: Dr. Bernard Linde voel sy lewe benodig standvastigheid: die tyd het aangebreek om ʼn vrou te vind. Een stormnag laai hy ʼn vreemde vrou op – en net so skielik verdwyn sy.

ʼn Vrou vir Ver-en-Naby:​ Laura Krause wonder hoe ver ʼn mens moet ry om uit ʼn huwelik te kom. Sy het nie die antwoorde wat Simon soek nie, maar miskien lê die antwoord in ʼn onverwagse afdraai en ʼn koppie tee op Clarens.

Oor die skrywer:

Helene de Kock het aan die Rand grootgeword, aan die Universiteite van Pretoria en Noordwes gestudeer, en aan verskeie konservatoria onderrig in sang ontvang. Helene het ’n PhD in skryfkuns. Sy skryf voltyds en woon in Pretoria. Daar het reeds talle romans uit haar pen verskyn.

Lucille du Toit beantwoord ’n paar vrae

n Muse vir Tess deur Lucille du Toit was NB-Liefdesverhale se Maart boek van die maand. Sy het so ‘n paar vrae beantwoord:

  1. Jou hoofkarakters het albei deur egskeidings gegaan. Waarom spesifiek hierdie agtergrond?

‘n Bekende tydskrif het op hul Facebook-blad gevra vir snaakse maniere hoe mense hul lewensmaats ontmoet het, een inskrywing het my oog gevang. Dit was n vrou wat vertel het dat sy en haar man mekaar by hul ekse se huis ontmoet het. Hy was haar eks se nuwe vrou se eks! Verwarrend, ek weet, maar op daardie stadium was ‘n hele paar van my kollegas en vriendinne besig om deur egskeidings te gaan. Ek het gedink soveel mense kan met die struikelblok assosieer dat ek besluit het om my karakters in dieselfde posisie te plaas en vir hulle ʼn gelukkige einde te gee. Ek is self nog nooit geskei nie, maar glo dat almal tweede kanse verdien.

 

  1. Jan-Daniel is ’n tandarts, en ’n sexy een daarby! Hoe skryf mens ’n sexy tandarts?

Met ‘n goeie skoot verbeelding! Tandartsspreekkamers gee my koue rillings, maar ek glo as ek nie op my held kan verlief raak nie, sal my leser ook nie en ek wou hom ʼn normale alledaagse beroep gee. Enige man in enige beroep kan mos sexy wees.

 

  1. Vir inspirasie raadpleeg Tess ’n kunstenaarsboek met verskillende stories. Hoe vergelyk jou kreatiewe proses van Tess s’n?

Net soos Tess lees ek ook graag boeke vir inspirasie, in my geval net liefdesverhale. Ek wil graag glo dat my kreatiewe proses georden is, maar dis glad nie die geval nie. Al beplan ek hoe vooraf wat in elke hoofstuk gebeur, laat karakters hulle nie voorskryf nie en is daar gewoonlik baie strepe deur my beplanning wat gevolg word deur tonne doodles (nie skilderye nie!), tot ek met nuwe, beter idees vorendag kom.

 

  1. Jy skryf onder ’n skuilnaam. Waarom? Het dit enigsins bygedra tot die skryfproses, die wete dat niemand gaan weet dit is jy nie?

Toe ek vir my kinders sê dat ek liefdesverhale gaan begin skryf het hulle gevra asseblief tog net nie onder my eie naam nie! Maar die eintlike rede is omdat ek ook in ander genres skryf en nie my lesers wil verwar nie. Ek dink tog die skans gee mens bietjie meer vrymoedigheid om te skryf sonder om veroordeel te voel.

 

  1. ’n Muse vir Tess is jou debuut as liefdesverhaalskrywer. Wat kom volgende?

Om liefdesverhale te skryf is net so ontspannend soos om dit te lees. So nou dat die gogga my gebyt het, beplan ek om so veel as moontlik daarvan te skryf. Ek werk tans aan ’n verhaal wat November in NB-uitgewers se Ultrasatyn 3 sal verskyn. Daar verskyn ook later die jaar een van my verhale in Lapa-uitgewers se vierde Romanza-Liefde.

 

  1. Watter boeke lê tans op jou bedkassie, of waar ook al jou “to read”-hopie gebêre word?

Op my bedkassie lê daar altyd een of twee Nora Roberts-boeke. Terry Hayes se I am Pilgrim waaraan ek tans lees, The Valley of Amazement van Amy Tan en The thing about Jellyfish van Ali Benjamin.
Laaste, maar nie die minste – kan jy dalk ’n foto met ons deel wat verband hou met die boek?

Die foto is van ‘n plaaslike kunstenares se Facebook-blad verkry. Sy was my inspirasie vir Tess.


Wil jy graag ‘n Muse vir Tess lees? Koop dit nou! Takealot | Loot | Graffiti | Amazon Kindle