Luister na Malene Breytenbach se onderhoud op RSG Skrywers en Boeke

Malene Breytenbach is een van Afrikaans se mees bedrewe skrywers met meer as 30 liefdesverhale en 6 romans op haar kerfstok. Sy het onlangs op RSG se Skrywers en Boeke-program met Suzette Kotzé-Myburgh gesels oor haar skryfwerk.

Sy beantwoord onder meer die volgende vrae:

  • Wat is die verskil tussen ’n romanse en ’n roman?
  • Waar kom haar skryflus vandaan?
  • Hoe lyk haar skryf-werkswyse?
  • Waar kom haar storietemas vandaan?
  • Hoe vind haar studies neeslag in haar werk?
  • Wat is die moeilikste van skryf?
  • Hoe doen sy haar navorsing?

Die onderhoud begin by 5:40. Luister na die potgooi:

 

(Of luister op RSG )


Van sorg na liefde deur Malene Breytenbach was NB-Liefdesverhale se Mei boek van die maand. 

Koop dit nou!  Raru | Graffiti Takealot (eboek) | Amazon (eboek) |

 

 

Ilze Beukes beantwoord ’n paar vrae

Ilze Beukes, skrywer van ons Februarie boek van die maand, het sewe vrae oor Hart se tweede kans en haar skryfwerk beantwoord:


ilze-beukes

  1. Die Hartklop-reeks bied liefdesverhale wat afspeel in ’n mediese milieu en ’n tuisversorgingspraktyk bied die mediese agtergrond vir Hart se tweede kans. Waarom spesifiek hierdie been van die bedryf?

Aangesien ek vir jare by ‘n aftree-oord gewerk het, was dit vir my ‘n bekende en natuurlike keuse vir die agtergrond van die storie.

  1. Eugene Maritz is ’n pediatriese kardioloog – en ’n baie aantreklike een daarby! Is hy op iemand in die werklikheid geskoei? Soos watter bekende sou jy sê lyk hy?

Nee, hy het sommer net eendag opgedaag in Hart se tweede kans. Hy lyk soos Sam Heughan.
sam-heugen

  1. Die verhaal speel meestal by Dr Maritz se praghuis in Durbanville af. Waarom het jy juis hierdie dorp gekies?

Ek het al in heelwat provinsies van Suid-Afrika gewoon. Alhoewel ek in die Vrystaat bly, is ek steeds in my hart ‘n Kapenaar. Met my storiebeplanning het ek op die internet rondgesoek na huise wat te koop aangebied word en op hierdie droomplek afgekom wat dadelik my hart gesteel het. Mens mag mos maar droom … en daaroor skryf. Of hoe?

  1. Hart se tweede kans het die verwerking van gesinstrauma as onderliggende tema. Wat het jou genoop om daaroor te skryf?

My ma woon in die Kaap en het gedurende Mei 2015 op 83 jarige ouderdom geval terwyl sy alleen by die huis was. Die situasie rondom die beenbreuk was iets wat ek saam met haar deurgegaan het, ook die verskuiwing na die aftree-oord waar sy nou bly. Dit het my diep geraak.  Buiten die aftree-oord waar ek vir sewe jaar ‘n boekhoudster was, het ek ook by CAD (‘n instansie vir ondersteuning aan alkohol en dwelmafhanklikes) gewerk, daarom is dit vir my tweede natuur om sulke onderwerpe aan te raak.

 

  1. Het jy enige skryfrituele? Hoe werk jou skryfproses?

Iets sal gebeur of soms skiet ‘n gedagte my net binne, wat aanleiding gee of as ‘n prikkel dien vir die kern van die storie. Daarna begin ek met die groot beplanningsproses. Ek besluit wie my karakters gaan wees en watter kwaliteit hulle uniek gaan maak. Bv. wat hul naam gaan wees, waar hulle gaan woon en werk, hulle kleredrag, spraakpatroon, ensovoorts. Navorsing en beplanning is my gunsteling deel van skryf, daarom spandeer ek baie tyd daaraan.  Ek maak seker dat mediese prosedures en enige ander inligting so ver moontlik korrek is. Daarna volg die storie meestal sy eie kop. Soms ver verby ure-lange beplanning. Ek volg maar net.

  1. Wie is van jou gunsteling liefdesverhaalskrywers?

Amelia Strydom, Elsa Winckler, Jacolet van den Berg, Madelie Human, Kristel Loots en nog vele ander. Te veel om op te noem. Ek lees wyd. Engels en Afrikaanse boeke.

  1. Laastens, watter boeke het jy onlangs gelees wat jy vir lesers kan aanbeveel?

Ek is besig met ‘Lente in ‘n bottel’ van Jacolet van den Berg. Sover geniet ek dit baie.


hart-se-tweede-kans-covHart se tweede kans deur Ilze Beukes is NB-Liefdesverhale se Februarie boek van die maand, die tweede vir 2017!

 

Koop dit nou! Loot | Amazon (Kindle) | Takealot | Takealot eBook

Trish Goosen beantwoord ’n paar vrae

Trish Goosen, ons eerste skrywer van die maand vir 2017, het ‘n paar vrae oor Vurig op Flaminkevlei beantwoord:

trish-goosen

  1.  Liefde op Langebaan, Hartstog op Hartenbos, Vurig op Flaminkevlei … Wat kom eerste, die wonderlike titel of die storie?

Ek dink gewoonlik eers aan die plek waar ek my verhaal wil laat afspeel. Dit moet natuurlik ‘n plek wees wat ek goed ken, anders sal my uitbeelding daarvan nie geloofwaardig wees nie. As ‘n besige werkende mamma van twee jong seuntjies, het ek nie tyd om veel navorsing te doen nie. Tweede kom die titel en derde die storie. Nadat Liefde op Langebaan die lig gesien het, het my vorige liefdesverhaalredakteur, Hester, genoem sy hou van die feit dat die romantiese verhaal op ‘n vakansiedorp afspeel. En nét daar is die idee gebore om my daaropvolgende verhale ook op vakansiedorpe te laat plaasvind.

  1. Waar kom die inspirasie vir Vurig op Flaminkevlei vandaan?

Ek was verlede somer op ‘n plesierboot op die Bergrivier in Velddrif. Wow! Need I say more?

  1. Is Liam en Belinda op werklike mense geskoei?

Mense vra my nogal gereeld of die karakters in my verhale op regte mense geskoei is. Die antwoord is nee én ja. Sommige van my vriendinne sê hulle het al hulself in my verhale raakgelees. Hulle is nie heeltemal verkeerd nie. Ek voeg stukkies van die mense om my se persoonlikhede bymekaar om my karakters te skep. En een ding wat vir my baie belangrik is, is om ‘n heldin te skep wat glad nie soos ek is nie.

  1. Vertel ons van jou skryfproses – waar, wanneer, vir hoe lank?

Ek het nooit tyd om te skryf nie. My dae is baie vol. Wanneer ek skryf, moet ek my slaap opgee. Maar op ‘n manier maak ek tyd. Dit is ‘n gebedsaak. Ek skryf omdat ek graag wil en dit een van die min dinge is wat ek vir myself doen. Daarom is daar nooit ‘n patroon aan wanneer en hoe lank ek skryf nie. Ongelukkig kan ek nie sê ek gaan sit met my skootrekenaar by die see of in ‘n koffiewinkel om te skryf nie. Dit sou seker baie meer interessant gewees het om dit te sê, maar ek vind ek skryf maar die beste by my huis wanneer almal slaap en daar uiteindelik stilte is.

  1. As inspirasie laag daal, waar gaan soek jy die muse? Of is die muse ’n mite?

Inspirasie daal gewoonlik laag wanneer my lewe baie besig raak. As ek dag vir dag teen die spoed van wit lig op die hamsterwieletjie hardloop, word my kreatiwiteit onderdruk. Dis gewoonlik op my afdae en naweke wanneer die idees weer begin vloei. ‘n Lekker lang bad help ook daarvoor.

6.  Het jy enige raad vir voornemende liefdesverhaalskrywers?

Probeer sensories dink. Wanneer dit by liefde en passie kom, wil mense hulself in ‘n verhaal inleef.

7. Wat lees jy op die oomblik?

Velddrif se Stories deur Lokkie van Zyl en I, Saul deur Jerry B. Jenkins.


vurig-op-flaminkevlei-covVurig op Flaminkevlei deur Trish Goosen is NB-Liefdesverhale se Januarie boek van die maand, die eerste vir 2017!

Koop dit nou! Loot | Raru | Van Schaick | Amazon Kindle

Malene Breytenbach beantwoord ’n paar vrae

Malene Breytenbach, skrywer van Oktober se boek van die maand Grenslose liefde, het so ‘n paar vrae oor hierdie Hartklop-verhaal beantwoord:

malene3-kleur

  1. Grenslose liefde neem lesers na die beeldskone Skotse Hooglande. Hoe het jy jou navorsing gedoen om dié omgewing, veral Strahan Castle, so suksesvol op papier oor te dra?

Ek is nog altyd gefassineer deur die Skotte met hulle drag, hulle doedelsakke, hulle Hoogland-klans en oorloë en kastele en hulle romantiese geskiedenis soos dié van Bonnie Prince Charlie wat teruggekeer het Skotland toe en weer die troon vir die Stuarts wou wen. Die landskap is pragtig. Die kasteel van Eilean Donin word byvoorbeeld die mees fotogeniese kasteel  ter wêreld genoem.  Ek het die geskiedenis en werklike kastele nagevors en my plekke daarop gabaseer. Ek lees graag geskiedenis.

 

  1. Colin Mackenzie is ’n behoorlike Hartklop-held. Is hy op iemand gegrond of het jy hom uit jou verbeelding opgediep? Hoe gaan jy te werk om ’n outentieke held te skep?

Colin is nie op enigiemand spesifiek gebaseer nie, hoewel die held van Outlander dalk ’n slag deur my kop gehardloop het.  En Liam Neeson soos hy in Rob Roy was. En Mel Gibson in Braveheart. En gen Andy Wauchope van die Black Watch. My held is net skoner (!!) en hy moet natuurlik intelligent en adellik wees. Ek verbeel my ’n man, dink aan sy voorkoms en persoonlikheid. Onthou Skotte wat ek in Zimbabwe geken het. Die man het sulke onmoontlike blou oë gehad. Ek raak self so ’n bietjie verlief op dié ideaal, en siedaar! Colin is gebore.

  1. Die hospitaalpasiënte is tog vreeslik interessant! Van die aktrise wat haar verbeel sy is Mary Queen of Scots tot die politikus – vanwaar die inspirasie vir hulle?

Mense soos akteurs en rocksterre, uitgewaste politici en getraumatiseerde dog heroïese soldate is lekker uiteenlopend.  Die skone Mary Queen of Scots se verhaal  is ook fassinerend. In een fliek is die kasteel Eilean Donin werklik gebruik as Fotheringhay-kasteel waar sy tereggestel is.  Die mense het hulle aan my kom voorstel en gevra om in die boek te wees.

  1. Wat lok jou aan na die Hartklop-reeks?

Die lekkerste omtrent die Hartklop-reeks is dat ek dinge kan navors waaroor ek nie voorheen gedink het nie. Ek leer oor mediese dinge. Nuwe wêrelde gaan vir my oop. Karakters kry lewe. Ek skep ’n nuwe wêreld.

  1. Het jy enige skryfrituele? Hoe werk jou skryfproses?

Ek het geen rituele nie. Ek begin in die oggend werk en nie altyd dieselfde tyd nie. Skryf totdat ek voel ek moet nou eers afskakel. Gaan rekenaar toe as ek skielik aan iets dink. Kry idees in die nag en vroeë oggend as ek in die bed lê en dink. Ek dink dis verkeerd om te karring. Ek skryf as ek min of meer vars is.

  1. Jy is een van die mees bedrewe liefdesverhaalskrywers in die land. Waar vind jy inspirasie vir al jou stories?

Ek weet nie regtig waar ek inspirasie vind nie. Soms sien ek ’n fliek, of lees iets, of iemand gee my ’n wenk. Dan broei ek gaandeweg die eier uit. Dink eers aan ’n agtergrond wat my fassineer en skep dan die karakters. Gaan op verbeeldingsvlugte en sien plekke en mense wat vir my so werklik raak soos werklike mense en plekke. Dan skryf ek daaroor.

  1. Laastens, watter boeke het jy onlangs gelees wat jy vir lesers kan aanbeveel?

Ek lees sonder ophou. Ek het Michael Ondaatje se The Cat’s Table onlangs gelees en toe lees ek weer sy manjifieke The English Patiënt. Verder lees ek nog Elsabé Brits se boek oor Emily Hobhouse, Geliefde Verraaier. Ek het Chanette Paul se Offerlam onlangs baie geniet. Ek lees ook Li Cunxin se Mao’s Last Dancer en Marianne Thamm se Hitler, Mandela and Me. Ek lees meer as een boek op ’n slag. Lees waarvoor ek in die stemming is. Ek kan natuurlik alles aanbeveel.


 

grenslose-liefde-covGrenslose liefde deur Malene Breytenbach is NB-Liefdesverhale se boek van die maand in Oktober!

Koop dit nou: Loot | Raru | Reader’s Warehouse | Graffiti

 

Susan Pienaar beantwoord ‘n paar vrae

Susan Pienaar, skrywer van September se boek van die maand Onbeteuelde liefde, het so ‘n paar vrae oor haar liefdesverhaal beantwoord:

susan-pienaar

  1. Waarom het jy besluit om jou heldin in Onbeteuelde liefde, Isabella Santarelli, half-Italiaans te maak? Is daar iets van die Italiaanse kultuur wat jou aantrek?

Die raamwerk en karakters en my plot was uitgewerk voor ek met navorsing kon begin het. Isabella is ’n beroemde model en vir die verhaal om te kon werk, moes sy vir ’n paar jaar lank nie in Suid-Afrika kom kuier het nie.

In my navorsing oor die modewêreld in die buiteland het ek ontdek dat Italiaanse modelle van die gewildste ter wêreld is.

Hul kultuur: Italianers is meestal vurig en passievol, net soos Isabella.

  1. Die grootste gedeelte van jou verhaal speel egter in die Vrystaat af. Jy het self lank in Bethlehem gebly. Vind jy die omgewing bekoorlik?

Die Vrystaat se oop ruimtes en stilte lê my na aan die hart. En die kosmos! Bethlehem is eintlik deesdae ’n moderne stad.

  1. Vertel ons ’n bietjie van die navorsing wat jy moes doen oor opleidingskampe vir perderuiters en oor die teel van renperde, die agtergrond waarteen hierdie liefdesverhaal afspeel.

Navorsing is vir my die heel belangrikste element en word eerste gedoen voor ek daadwerklik kan begin skryf. In Suid-Afrika en Namibië is daar heelwat boere wat met Arabier en ander volbloedperde teel, dus moet my feite 100% korrek wees. Wat sou ons sonder Google gedoen het? En die Landbou-weekblad! Ek het darem ook met mense gesels wat met boerperde teël en daelange langafstand-uithouritte  in groepe aflê.

  1. Het jy self so ’n bietjie op jou held, Nicholas Burger, die renperdteler, verlief geraak? Hoekom?

O, beslis!  Nicholas is ’n perdeteler, veearts en suksesvolle sakeman met deursettingsvermoë – als dinge wat ek hoog op prys stel – en daarby is hy ook hartbrekend aantreklik. Sy behulpsaamheid en geduld en respek waarmee hy Isabella se  ietwat langdradige pa behandel, is een van die baie redes hoekom ek saam met Isabella op Nicholas verlief geraak het.

  1. Jy skryf vir die Satyn- sowel as die Hartklop-druknaam. Verskil jou benadering wanneer jy vir die verskillende drukname skryf? Hoe verskil dit?

My benadering verskil nie radikaal nie . . .  Satyn- sowel as Hartklop se verskillende beroepe word gebruik om spanning tussen die held en heldin se fisiese aantrekking, verskillende opinies en argumente deur te vervleg. Dokters en veral chirurge het soms tot 13 jaar of langer studeer, met min slaap klaargekom en sit met duisende rande studieskuld wat afbetaal moet word, dus het hulle oor die algemeen ’n chip op die skouers. Hulle verdien hul outoriteit en geld en status.

  1. Laastens, maar nie die minste nie: Watter boeke lê op die oomblik op jou boekrak?

O jitte, ek het drie yslike volgepakte boekrakke. Ek lees wyd. Op my spieëlkas lê Afrikaanse en Engelse boeke wat ek onlangs aangeskaf het en nog sal lees. Op die kassie langs my bed is daar: LEEF uit die KRAG van GOD deur Solly Ozrovech. My Bybel. Gone Girl deur Gillian Flynn. The Fountainhead deur Ayn Rand.


Onbeteuelde liefde deur Susan Pienaar was NB-Liefdesverhale se boek van die maand in September!

Lees meer oor hierdie boek

Koop dit nou! Takealot | Loot | Reader’s Warehouse | Leserskring | Amazon Kindle

 

 

 

Anita du Preez beantwoord ’n paar vrae

Ons hartsvriendin het vir Anita du Preez, skrywer van Letitia en die lektor, so ‘n paar vrae gevra om die persoon ágter Augustus se ‘Boek van die maand’ beter te leer ken:

Anita du Preez

  1. Wat het die sappige storielyn van Letitia die lektor geïnspireer?

ʼn Insident op die kampus waar ek klasgee.  Toe ruk dit heeltemal handuit in die storie en soos karakters maar dikwels doen, besluit die vark in die verhaal toe hy wil liewer die sexy held in die verhaal wees. Toe is hy.

  1. Margot en die meerman, Die wet van liefde, Bambi en die boef, Hermien en die hartedief … Waar kom hierdie lekker titels vandaan?

Sommer uit my kop. Ek hou van rymelary en alliterasie en so het dit so half my “thing” geword om die heldin se naam met dieselfde letter te laat begin as die bynaam van die held. Ek hou van my taal en dis lekker om daarin te mag speel.

  1. Vertel ons van jou skryfproses – waar, wanneer, vir hoe lank?

Sedert 2007/8. Eers in Port Elizabeth, toe in die Kaap en altyd voor my kamervenster. Ek begin met die  eerste sin en daar gaat ek. Lees alles honderd keer oor en oor en is nie sommer tevrede nie. Vol fiemies. Maar dis lekker!

  1. As inspirasie laag daal, waar gaan soek jy die muse? Of is die muse ’n mite?

Ja! Sy bestaan wel, maar sy besoek jou net as jy werk. Sy val nie uit die lug nie. Sy woon in jou sleutelbord, daar waar jou karakters ook sommer so onder jou vingerpunte uitspring en sê “hei! Skryf my!”

  1. Wat kan jou aanhangers volgende verwag?

Aanhangers? Het ek aanhangers? Sjoe dankie julle! Hang net nog ʼn bietjie aan daar gebeur dalk nog ʼn liefdesverhaal teen Desember.

  1. Enige raad vir die wat ook graag liefdesverhale wil skryf?

Skryf hom. As hy in jou kop woon sal hy nooit weggaan en jou uitlos voor jy hom skryf nie, dus het jy nie juis ʼn keuse nie. So skryf hom dat die sop spat! En moet hom nie in ʼn file wegsteek nie. Wys dit vir iemand. Jy weet nooit!

  1. Wat lees jy op die oomblik?

Pamela Jooste People Like Ourselves (weer nou net klaar), Tyne O’ Conell Sex< Lies and Litigation (besig mee), Praba Moodley The Ties That Bind, Henning Mankell se Kennedy’s Brain (wag altwee op die bedkassie) en ʼn hoofstuk uit my Holy Bible New International Version, saans voor ek slaap. Ek het ook so pas my oë toegeknyp en my beursie oopgemaak en Deon Meyer se KOORS gekoop. Dus lê dit nou bo op al die ander boeke op my bedkas!

DSC_0203

 

Letitia en die lektor

Letitia en die lektor deur Anita du Preez is NB-Liefdesverhale se boek van die maand in Augustus!

Koop dit nou: TakealotVan Schaik | Raru | Amazon Kindle | Graffiti

Liefde deur ’n lens: Elsa Winckler beantwoord ’n paar vrae

Hartsvriendin Carolyn Meads het met Elsa Winckler gesels om meer uit te vind oor haar jongste liefdesverhaal, Liefde deur ‘n lens:

Elsa Winckler 

  1. Liefde deur ’n lens is die derde boek in ’n trilogie wat deur Om Amelie se tafel en Liefde in laslap voorafgegaan word (hoewel elke boek ook op sy eie kan staan). Was dit van die begin af jou plan om ’n trilogie te skryf of het sekere newekarakters net daarop aangedring dat jy húlle liefdesverhaal ook vertel

Nee, ek het nie ’n reeks beplan nie. Om Amelie se tafel het ontstaan uit ’n idee dat die heldin ’n rekenaar bo ’n ring sal verkies 😊 Natalie is Amelie se vriendin van skooldae af en toe sy en Chris se broer Neethling ontmoet, kon ek sien hier kom ’n ding. Ek was halfpad met Liefde in laslap toe Francois, Natalie se broer, net eenvoudig homself in die storie dwing. Ek het dadelik ophou skryf en gaan stap, ontsteld oor die karakter wat ewe skielik homself kom opdring. En iewers op my wandelpad begin ek wonder hoekom dra Nicola altyd ’n kamera om haar nek. En net daar, val die derde storie Liefde deur ’n lens, in plek.

  1. Nicola Meyer, die heldin van Liefde deur ’n lens, is ’n fotograaf wat regoor die wêreld foto’s neem. Vertel ons van die navorsing wat jy moes doen om haar beroep geloofwaardig uit te beeld. 

Ek neem foto’s met my foon so ek is geen fotograaf nie, maar ek is mal oor besonderse fotografie en lees baie daaroor. Die portretstudies wat Nicola doen, is inspireer deur Joyce Tenneson se werk wat vir my baie aangrypend is (loer na sy werk)

  1. ’n Gedeelte van die boek speel in Santa Fe in Nieu-Mexiko af. Is dit ’n plek wat jy al self besoek het? Waarom het dit jou geïnspireer?

Ek het gesoek na ’n fotografiekursus wat Nicola kon gaan doen en het op die manier gesien in Sante Fé word daar jaarliks sulke kursusse aangebied. En toe moes ek meer uitvind oor Sante Fé en natuurlik is dit nou op my bucketlys om soontoe te gaan! Klink na ’n wonderlike plek waar enige vorm van kuns te sien is. Nicola moes blyplek hê en so het ek op die Inn of the five graces afgekom – die idee van die ‘five graces’ word op die inn se webwerf bespreek – wat toe baie mooi inpas by die storie

  1. Waarom is Nicola so aangetrokke tot Francois Olivier, haar skoonsus se broer? En andersom: Waarom is Francois so mal oor haar?

Beide besef daar is ’n ‘spark’ tussen hulle, maar Nicola kruip jare lank al agter haar kamera weg en steek weg hoe diep dinge haar werklik raak. Francois sien dit raak en sy begeerte om die werklike Nicola te ontdek, is die rede hoekom hy haar weer en weer opsoek.

  1. In die verhaal onderdruk Nicola pynlike herinneringe, maar Francois sien die seer raak wat sy probeer wegsteek. Glo jy in die helende krag van liefde?

O, ja. Tussen al die vreeslike dinge wat daagliks rondom ons gebeur, is dit die een wonderbaarlike sekerte – liefde oorwin, altyd.

9780624076018---Liefde-deur-`n-lens-cov

 

 

 

 

Koop dit nou! TakealotBargain Books | CNA | Graffiti | Raru| Amazon Kindle