Junie boek van die maand: Wierook van verlange deur Annelize Morgan

Wierook van verlange deur Annelize Morgan is NB-Liefdesverhale se Junie boek van die maand:

Dit is die agtiende eeu in Frankryk. Al wat Liliane Beaudelaire van haar ouers het, is ’n hangertjie met ’n onverstaanbare inskripsie en ’n brief waarin haar pa verduidelik dat hy in Arabië na Liliane se ma gaan soek om haar na Frankryk terug te bring. Hy het egter nooit weer sy verskyning gemaak nie en Liliane het in die weeshuis grootgeword.

Toe ene monsieur Laurent vir die twintigjarige Liliane ’n werk in sy huishouding in Arabië aanbied, gryp sy die kans om na die land te gaan waar haar ouers hul moontlik bevind. Maar in Arabië beskuldig die forse sjeik Dawud vir Laurent daarvan dat hy ’n slawehandelaar is en Liliane maak die angswekkende ontdekking dat haar nuwe werkgewer inderdaad beplan om haar as die slavin Farhah te verkoop.
Durf sy hoop dat die enigmatiese sjeik Dawud haar sal help? En wat weet hy omtrent haar ware identiteit?

’n Historiese liefdesverhaal deur die immergewilde skrywer Annelize Morgan, propvol avontuur en hartstog.

Oor die skrywer:

Annelize Morgan is ’n ou hand wat liefdesverhale betref. Sy het meer as 40 titels agter haar naam en is bekend vir haar verhale vol spanning en intrige, asook verhale wat in die woestyn afspeel. Sy en haar man woon op Ladismith.

Koop dit nou!  MySubs | Raru | Loot | Graffiti | Amazon (Kindle)

Lees ’n uittreksel uit Van sorg na liefde deur Malene Breytenbach

Van sorg na liefde deur Malene Breytenbach is NB-Liefdesverhale se Mei boek van die maand:

Ná ’n liefdesteleurstelling gaan werk Mia de Villiers as ’n versorger op die eiland van Jersey. Sy kom goed met haar werkgewer, die weduwee Sarah de Lisle, oor die weg, maar met dié se seun, Jean, sit sy vas. Jean insinueer dat sy gekom het om ’n ryk man te vang en Mia vererg haar. Dink hy sy is ’n trofeemeisie wat deur rykdom beïndruk word? Hy is uiters aantreklik, maar sy swig nie voor ’n rokjagter nie. Al wys hy gaandeweg sy sagter kant ….

Lees ‘n uittreksel uit hierdie lekkerlees-liefdesverhaal:


Die Bentley hou voor die huis se deur stil. Mia is verlig dat John nou die rolstoel uit die kattebak kan haal en Sarah help om daarin te klim. Sy wou dit nooit laat blyk nie, maar dit was altyd besonder swaar om op te tel. Die werksmense wat die voorbereiding vir die fees moes doen, is reeds weg. Mia wonder of Jean al gekom het. Teen dié tyd behoort hy darem hier te wees.

Toe hulle by die huis ingaan, kyk sy verwonderd rond. Oral is vase met blomme en die meubels is geskuif. Daar is versierings en dit lyk feestelik. Hulle gaan kyk na die groot eetkamer en sien dat dit reggemaak is vir baie mense. Op die tafels is eetgerei en servette uitgepak. Net die kos moet nog kom. Skitterblink glase is al uitgepak, maar die drank is nog nie daar nie. Assistente en kelners wat Etienne gehuur het, loop heen en weer van die kombuis na die eetkamer. Oral is stoele in groepe uitgesit.

Die groot salon lyk asof dit reggemaak is vir mense om te dans. Die orkeslede is reeds daar op ’n verhogie. Almal dra swart pakke met wit strikdasse. Twee is besig om viole in te stem, een toets die klavier en ’n ander een sit by die tromme. Hier word nie sommer opnames of ’n deejay gebruik nie, dink Mia. Nee, die orkeslede kom in lewende lywe, met instrumente en bladmusiek. Dit is ouwêrelds elegant.

Barnes loop daar rond met ’n kritiese gesig asof hy alles moet goedkeur. Hy kom nader gehaas. “Lyk dit goed, mevrou?”

“Absoluut,” sê Sarah. “Dit lyk asof alles onder beheer is. Kom ons gaan boontoe, Mia. Ek moet eers ’n rukkie rus voordat die partytjie begin.”

Sy ry met die hyser op en Mia volg. Eers help sy Sarah om gemaklik met ’n nekkussing op haar bed te gaan lê, sodat sy nie haar hare druk nie, toe gaan sy na haar kamer. Sy is net binne, toe steek sy vas. Nie oor Sylvester lekker uitgestrek op haar bed lê nie, maar oor die langwerpige boks met ’n silwer lint en strik om, wat langs hom lê.

“Hallo, weet jy wie het dit gebring?” vra sy vir die kat, wat met lui skrefiesoë na haar kyk. “Ek wens jy kon praat.”

Daar is ’n kaartjie met die woorde: Vir vanaand. Met geen naam by nie.

Hierdie geskenk kom sekerlik van Sarah af. Wat kan dit wees? Sy maak die silwer strik los, verwyder die lint en maak die boks oop. Mia snak na asem. In sneespapier is iets opgevou. Dit is smaraggroen en lyk asof dit van sy gemaak is. Met bewende hande tel sy dit uit. Dit is ’n rok in haar grootte met ’n eenvoudige, dog uiters elegante snit.

Sy hou dit voor haar en kyk in die spieël. Dit is so mooi dat sy lank daarna staar. Watter goeie smaak het Sarah tog! Sy het ook die grootte reg geraai. Fairy godmother, dink sy, en glimlag. Hoe dierbaar van haar werkgewer om aan so iets te dink. Sy het juis gewonder of sy enigsins na die partytjie gaan.

Nou weet sy, sy is tog genooi. Normaalweg sou sy nie sommer so ’n geskenk kon aanvaar nie, maar sy het reeds agtergekom dat dit vir Sarah lekker is om vir haar goed te gee.

Die mense word vanaf sewe-uur verwag. Sarah het ’n uur lank gaan rus, maar daarna moet Mia haar help aantrek en voorberei. Sy gaan bad eers, versigtig om nie haar hare nat te maak nie. Daarna grimeer sy liggies, kam deur haar hare en trek die rok aan. Sy staan voor die spieël en staar na haar beeld. Die rok pas haar soos die spreekwoordelike handskoen. Vlei eintlik haar figuur. Dit is ongetwyfeld ’n baie duur boetiek- rok en die etiket is Frans. Dit laat haar oë groen skitter en steek treffend af teen haar hare. Sy het nie gedink sy kan ooit so mooi lyk nie.

“Hallo, wie is jy?” lag sy. “Aspoestertjie in haar balrok wat die goeie fee vir haar getoor het?”

Gelukkig het sy ’n paar swart hoëpolvy-blink- leersandale saamgebring vir die wis en onwis. Dit pas by haar een swart aandrok wat sy ingepak het. Nou pas dit darem by dié rok wat net bokant haar knieë eindig. Haar kuite vertoon mooi as sy sulke stiletto’s dra.

Sy gaan na Sarah se suite. Toe sy inloop, klap Sarah haar hande. “Jy lyk beeldskoon, Mia.”

Mia bloos, maar sy voel gevlei. “Baie dankie, mevrou. Ek waardeer dit regtig.”

Sy help Sarah om ’n splinternuwe silwergrys rok en silwer skoene aan te trek. Sarah grimeer haar eie gesig. Daarna spuit sy parfuum aan haar self.

“Kom hier,” sê sy, en spuit van die parfuum aan Mia ook.

Sy maak haar laai oop en haal ’n juweelkissie uit. Mia moet haar help om diamante aan haar ore vas te maak, ’n eenvoudige diamanthalssnoer om haar nek vas te maak en ringe en ’n diamantarmband aan te sit.

“My man het vir my al dié juwele gegee,” sê sy. “Jean het dit uit die kluis gaan haal. Daar is iets wat ek wil hê jy moet dra. Jy kan dit vanaand leen om by jou mooi rok te pas. Dit het aan Bienne behoort.”

Sy haal ’n paar fyn diamantoorkrabbers uit en ’n goue kettinkie waaraan een diamant vas is.

“Toe, sit dit aan. Ek wil sien hoe dit lyk.”

Mia is skoon oorstelp. Wat ’n pragtige gebaar om haar lieflingdogter se juwele vir haar te gee om te dra. Sy kry eintlik trane in haar oë wat sy vinnig moet wegknipper. Sy maak die diamante aan haar ore vas en die hanger om haar nek.

“Nou lyk dit perfek afgerond,” glimlag Sarah. Mia sien dat sy ook trane in haar oë het. Sy druk haar skouer en sê hees: “Dankie dat mevrou so goed is vir my.”

“My liewe kind, jy is goed vir my. Nou toe, ons mag nie ons grimering afhuil nie. Neem my af, sodat ek kan help om die mense te ontvang.”

Jean verjaar en sy sal hom moet gelukwens, dink Mia. As sy aan hom dink, raak haar arme hart en lyf skoon oorstuur. Sy mag nie een oomblik vergeet dat hy ’n arrogante ryk man is nie, met ’n beeldskone trofeemeisie aan wie hy waarskynlik binnekort verloof sal raak.


Koop dit nou!  Raru | Graffiti Takealot (eboek) | Amazon (eboek) | MySubs

Nuut: Helene de Kock Keur 1

Helene de Kock Keur 1 bevat vier verruklike liefdesverhale met drama, intrige en ontstuimige onderstrome.

Die soete dwaling: Dr. Daïrus Deetlefs se ma probeer om sy lewe te regeer en om ʼn troue tussen hom en Martine te reël. Daïrus vlug na Londen en ontmoet daar iemand uit sy verlede, die misterieuse Sylvia Saunders.

Seisoen van die skimmelson: Madel studeer sang in Beiere en moet haar jeugliefde agterlaat. Net tydelik, so glo sy. Sy besef egter mettertyd dat sommige keuses moeiliker is as ander.

Anderkant die vloedwaters: Dr. Bernard Linde voel sy lewe benodig standvastigheid: die tyd het aangebreek om ʼn vrou te vind. Een stormnag laai hy ʼn vreemde vrou op – en net so skielik verdwyn sy.

ʼn Vrou vir Ver-en-Naby:​ Laura Krause wonder hoe ver ʼn mens moet ry om uit ʼn huwelik te kom. Sy het nie die antwoorde wat Simon soek nie, maar miskien lê die antwoord in ʼn onverwagse afdraai en ʼn koppie tee op Clarens.

Oor die skrywer:

Helene de Kock het aan die Rand grootgeword, aan die Universiteite van Pretoria en Noordwes gestudeer, en aan verskeie konservatoria onderrig in sang ontvang. Helene het ’n PhD in skryfkuns. Sy skryf voltyds en woon in Pretoria. Daar het reeds talle romans uit haar pen verskyn.

Mei boek van die maand: Van sorg na liefde deur Malene Breytenbach

Van sorg na liefde deur Malene Breytenbachis NB-Liefdesverhale se Mei boek van die maand:

Ná ’n liefdesteleurstelling wil Mia de Villiers vir ’n ruk uit Suid-Afrika wegkom en sy gaan werk as ’n versorger op die eiland van Jersey. Sy kom dadelik met haar werkgewer, die weduwee Sarah de Lisle, oor die weg, maar met haar seun, Jean de Lisle, sit sy vas.

Uit die staanspoor is Jean laat om haar by die lughawe op te laai en hy gee te kenne dat Mia sy kosbare tyd as eienaar van ’n makelaarsmaatskappy mors. Boonop insinueer hy dat sy na die belastingparadys Jersey gekom het om vir haar ’n ryk man te vang.

Mia vererg haar vir die arrogante vent met sy spoggerige Ferrari – hy moenie dink sy is soos sy trofeemeisies wat deur sy rykdom beïndruk word nie. Hy is nou wel die aantreklikste man wat sy al ooit teëgekom het, maar ná sy deur haar eks-verloofde verkul is, gaan sy beslis nie voor ’n rokjagter soos Jean swig nie. Al blyk dit ook gaandeweg dat dié alfaman ’n sorgsame, sagter kant het wat hy nie sommer vir enigeen wys nie …

Oor die skrywer: 

Dr. Malene Breytenbach het drie meestersgrade, asook ’n doktorsgraad in joernalistiek. Sy en haar man woon op Stellenbosch. Malene skryf sedert 2009 heeltyds en het verskeie liefdesverhale op haar kerfstok, sowel as die gewilde romans Gister is ’n ver landPluimprinse en Bloedgrond.

Koop dit nou!  Raru | Graffiti Takealot (eboek) | Amazon (eboek) | MySubs

Nuut: Ettie Bierman Keur 12

Drie heerlike liefdesverhale deur die immergewilde Ettie Bierman verskyn hierdie maand in Ettie Bierman Keur 12:

In Vermoedelik verlief stort Mynie se wêreld in duie toe haar kêrel saam met ’n beeldskone meisie op die lughawe gesien is. Hoe meer Heinz verduidelik, hoe minder glo sy hom. Sy skryf aan Wewenaar, ’n prokureur wat in ’n hoekie vir eensames adverteer. Eindelik ontmoet sy hom, die skatryk en aantreklike Conrad Duvenhage.  Natuurlik het hy ’n prys – maar dít vermoed Mynie nie.

In Twee roepees vir ’n lewe is Arista paniekbevange toe dit lyk asof ’n motor haar op die sypaadjie gaan tref. Sy hardloop vorentoe om die bruggie te haal en die bestuurder besef te laat wat haar plan is. ’n Voet in ’n rooi sandaal tref die Citroën se windskerm en daar is die klank van skeurende metaal . . .

In ’n Rooikop en twee ridders kyk Addy die ou met die Blou Bul-T-hemp vlak toe hy vir haar ogies maak by die Paddanag wat sy vir Matotoland Ekotoerisme reël. Wat haar betref, het hy ’n toksakbrein. Haar soort man is eerder iemand soos doktor Marius Theron, vir wie sy so getrou bystaan sedert sy egskeiding.

Oor die skrywer:

Ettie Bierman is ’n gewilde skrywer van romantiese verhale. Sy woon sedert 2003 aan die suidkus van KwaZulu-Natal.

Koop dit nou! Takealot | Loot | Graffiti | Amazon Kindle

April boek van die Maand: Die landheer van Koningshof deur Schalkie van Wyk

Die landheer van Koningshof deur Schalkie van Wyk is NB-Liefdesverhale se April boek van die maand:

Erika Strauss het klaar studeer en wil begin om sielkunde te praktiseer, maar skielik is haar eie psige vir haar ’n raaisel. Dis die aantreklike donkerkopman wat sy in die bure se tuin aangetref het wat haar kop so deurmekaarkrap. Wat sou haar besiel het om die wildvreemde man te soen en dit boonop te geniet?

Hy was geklee in ’n oorpak en het beweer hy is ’n tuinier en sy naam is Moos, maar sy weet sommer dit is nie waar nie. Wie is hy? En waarheen het hy verdwyn? Sy verbeel haar nou selfs dat sy hom, geklee in ’n aandpak, in ’n deftige restaurant gewaar het …

Sy moet haar regruk, want ’n ou vriend het haar hulp nodig om sy vrou se irrasionele vrese te help besweer. Maar Erika weet sy sal ook met haar eie emosionele bagasie moet vrede maak as daar enigsins vir haar ’n kans op liefde is …

Oor die skrywer: 

Schalkie van Wyk woon in Johannesburg.Toe sy laas getel het, het daar reeds oor die honderd liefdesverhale uit haar pen verskyn.

Koop dit nou! Loot | Takealot | Graffiti | Leserskring

Lees ’n uittreksel uit ’n Muse vir Tess deur Lucille du Toit

n Muse vir Tess deur Lucille du Toit is NB-Liefdesverhale se Maart boek van die maand:

’n Tandartsstoel is die laaste plek waar Tessa Meyer verwag het om haar muse teë te kom toe sy weer begin skilder het, maar een kyk in dokter Jan-Daniel Vermeulen se oë en skielik het sy inspirasie. Sy kan egter nie romanties by die mooi man betrokke raak nie. Haar skeisaak moet afgehandel word en haar dogters sukkel reeds om dit te aanvaar …

Lees ‘n uittreksel uit hierdie heerlike liefdesverhaal:


Op die stoep wys Jan-Daniel sy moet langs hom kom sit.

“Ek hoop nie jy gee om nie, maar Mia is besig om van Prinses ’n regte prinses te maak. Sy bad haar . . . in jou wasbak.” Tess huiwer voor sy sit. Sy is nie seker of dit ’n goeie idee is om so naby aan hom te wees nie. Dit voel asof haar lyf nie wil doen wat haar kop voorskryf nie. Toe Tess uiteindelik haar sit so ’n entjie van hom af kry, hou hy vir haar ’n glas sjerrie.

“Natuurlik nie. Ek is eintlik dankbaar. Ek het nie kans gesien om dit te doen nie.” Hy glimlag. “Jy weet, ek wou die hond eintlik net gehad het om vir … e … Lien te irriteer. En toe is sy sowaar bly daaroor. Haar nuwe liefde het blykbaar katte wat honde nie kan verdra nie.”

“Dit klink amper soos my eks. Ek dink net dit is eerder hy wat honde nie kan verdra nie.” Tess lag.

Jan-Daniel stik effens in sy sjerrie. “Jy sal maak dat ek môre my eks se hond vir haar gaan teruggee. Dalk voel haar ou ook so en bewys ek hom eintlik ’n guns deur die hond hier te hou.” Jan-Daniel teug aan sy sjerrie.

“Voel dit nie vir jou of alles net perfek vir jou eks en die man uitwerk en niks vir jouself nie?” Tess byt op haar lip.

“Ek tob nie meer daaroor nie. As ek nie goed genoeg was vir haar nie, is ek dalk goed genoeg vir iemand . . . anders.”

Voordat Tess besef wat gebeur, het Jan-Daniel haar been oor syne getrek. Sy sit verskrik orent asof iemand ’n pistool teen haar slaap druk. Wat maak die man nou?

“Ekskuus,” sê hy, maar hou haar been op syne. Tess kan elke druppel bloed in haar are hoor bruis. “Mag van die gewoonte. Ek het dit altyd vir my vrou gedoen na ’n lang dag.” Hy hou sy hande in die lug asof hy oorgee.

Tess kry haar been nie geroer nie. Dit lê net daar op die man se harde, gespierde bobeen. Sy is verlig sy het nie ’n rok aan nie.

“Gee jy om?” vra hy, maar hy glip al klaar haar skoen af voordat sy kan keer. Jan-Daniel se sterk hande neem oor en Tess vergeet van haar skaamte. Die manier hoe sy hande sorgvuldig om haar moeë voete vou, voel fantasties.

“Hmm, ek weet regtig nie wat jou eks nou sonder jou doen nie.” Die woorde vlieg by Tess se mond uit voordat sy dit kan keer.

’n Lag laat Jan-Daniel se lyf ruk. “Ek ook nie,” spot hy, maar dan skuif daar ’n gordyn van erns oor sy gelaat. “Het Tian jou nooit bederf nie?”

Tess trek haar skouers op. Sy kan dit nie teenoor ’n vreemdeling erken nie, maar soms het dit vir haar gevoel asof hy haar aspris seermaak. Asof haar trane hom die grootste vreugde gegee het. Niks wat sy gedoen het, kon sy liefde verdien nie. En toe bevestig hy dit deur haar vir ’n ander vrou te los.

Skielik is dit asof iemand ’n skakelaar in haar brein laat klik, en Tess lag: “Jy weet, noudat ek daaraan dink . . . ek moes eintlik ’n groot rooi strik om Tian gedraai het vir Sulien, die vrou vir wie hy my gelos het, en vir haar ’n pragtige dankiesê-brief geskryf het. Ek besef nou net ek moet dankbaar wees dat hy uit my lewe is. Dié keer is ek nie die slagoffer nie, sy is.”


Koop dit nou! Takealot | Loot | Graffiti | Amazon Kindle